पुणे : भारतात थॅलेसेमिया हा सर्वाधिक आढळणाऱ्या आनुवंशिक रक्तविकारांपैकी एक असून, दरवर्षी हजारो मुले या आजारासह जन्म घेतात. या आजाराचा परिणाम केवळ रुग्णांच्या आरोग्यावरच नव्हे, तर त्यांच्या कुटुंबांच्या भावनिक, सामाजिक आणि आर्थिक जीवनावरही होत असल्याने जनजागृती आणि प्रतिबंधाला विशेष महत्त्व प्राप्त झाले आहे.
जागतिक थॅलेसेमिया दिनानिमित्त इंडियन सोसायटी ऑफ ब्लड ट्रान्सफ्युजन अँड इम्युनोहेमॅटोलॉजी (ISBTI) महाराष्ट्र चॅप्टर आणि सह्याद्रि हॉस्पिटल्स ब्लड बँक यांच्या संयुक्त विद्यमाने शुक्रवारी (दि. ८ मे २०२६) पुण्यात “थॅलेसेमिया जनजागृती वॉकथॉन” आणि सतत वैद्यकीय शिक्षण (CME) सत्राचे आयोजन करण्यात आले.
सकाळी साडेसात वाजता सह्याद्रि हॉस्पिटल, डेक्कन येथून वॉकथॉनला सुरुवात झाली. लाकडी पूल आणि टिळक रस्ता मार्गे रॅली आयएमए हॉल येथे पोहोचली. त्यानंतर आरोग्यसेवा व्यावसायिक आणि ब्लड बँक कर्मचाऱ्यांसाठी रक्तसुरक्षा व जनजागृतीविषयक CME सत्र घेण्यात आले.
या उपक्रमात ५० हून अधिक थॅलेसेमिया रुग्ण, १५० पेक्षा अधिक ब्लड बँक कर्मचारी, वैद्यकीय अधिकारी, स्वयंसेवक आणि पुणेकर नागरिक सहभागी झाले होते. कार्यक्रमाची सुरुवात थॅलेसेमिया बाधित मुलांच्या हस्ते केक कापून करण्यात आली. या क्षणातून आशा, धैर्य आणि जिद्दीचा संदेश देण्यात आला.
ढोल-ताशांच्या गजरात निघालेल्या या रॅलीत सहभागी नागरिकांनी लाल रंगाचे टी-शर्ट आणि निळ्या टोप्या परिधान करून जनजागृतीपर फलक हातात घेतले होते. तसेच पथनाट्याद्वारे थॅलेसेमिया, रुग्णसेवा आणि वेळेवर रक्त संक्रमणाचे महत्त्व नागरिकांपर्यंत पोहोचविण्यात आले.
रॅलीदरम्यान सहभागींसाठी पाणी आणि अल्पोपहाराची व्यवस्था करण्यात आली होती. पुणे पोलिसांनी वाहतूक नियंत्रण आणि सुरक्षा व्यवस्थेची जबाबदारी सुरळीतपणे पार पाडली. या कार्यक्रमाला गिरीश हुकरे, डॉ. दिलीप वाणी, डॉ. पूर्णिमा राव, आर. व्ही. कुलकर्णी, डॉ. नीता मुंशी, डॉ. स्मिता जोशी, डॉ. सुनील राव, महेश कुलकर्णी आणि संग्राम राजे यांची उपस्थिती लाभली.
तसेच थॅलेसेमिया जनजागृती मोहिमेला पाठिंबा दिल्याबद्दल रेडिओ जॉकी संग्राम खोपडे यांचे आयोजकांनी विशेष आभार मानले.
या प्रसंगी सह्याद्रि हॉस्पिटलचे मुख्य वैद्यकीय सेवा अधिकारी डॉ. जयदीप चेतलुर म्हणाले, “थॅलेसेमिया हा केवळ वैद्यकीय आजार नसून रुग्ण आणि त्यांच्या कुटुंबीयांसाठी दीर्घकालीन भावनिक, शारीरिक आणि आर्थिक संघर्ष आहे. अशा उपक्रमांमुळे प्रतिबंधात्मक तपासणी, वेळेवर निदान आणि नियमित स्वेच्छा रक्तदानाचे महत्त्व अधोरेखित होते.”
सह्याद्रि हॉस्पिटल्स ब्लड बँकेच्या वरिष्ठ सल्लागार आणि ISBTI महाराष्ट्र चॅप्टरच्या सचिव डॉ. पूर्णिमा राव म्हणाल्या, “थॅलेसेमिया रुग्णांचे आयुष्य सुरक्षित आणि नियमित रक्त संक्रमणावर अवलंबून असते. त्यामुळे स्वेच्छा रक्तदान आणि प्रतिबंधात्मक तपासणीबाबत सातत्याने जनजागृती होणे अत्यंत गरजेचे आहे.”
डॉ. दिलीप वाणी यांनी ‘थॅलेसेमिया मुक्त भारत’ ही संकल्पना साकार करण्यासाठी रुग्णालये, ब्लड बँका, आरोग्यसेवा व्यावसायिक, रुग्ण कुटुंबे आणि सामाजिक संस्थांनी एकत्रितपणे काम करण्याचे आवाहन केले.
रॅलीनंतर आयएमए हॉल येथे सर्व सहभागी एकत्र आले. येथे अल्पोपहार, समूह छायाचित्र आणि शैक्षणिक CME सत्र पार पडले. संपूर्ण कार्यक्रमाचे चित्रीकरण दूरदर्शनने केले. कार्यक्रमाचे नियोजन आणि समन्वय सह्याद्रि ब्लड बँकेच्या श्रीमती अनघा पलसकर यांनी केले.
आयोजकांनी नागरिकांना थॅलेसेमियाबाबत जनजागृती वाढविण्याचे, नियमित रक्तदानात सहभागी होण्याचे आणि प्रतिबंधात्मक तपासणीस पाठिंबा देण्याचे आवाहन केले. त्यामुळे भविष्यात थॅलेसेमिया मुक्त आणि निरोगी समाज निर्माण करण्यास मदत होणार असल्याचा विश्वास व्यक्त करण्यात आला.
