पुणे : आनंदी युनिव्हर्स फाउंडेशनतर्फे आयोजित ‘राष्ट्रीय गौरव पुरस्कार सोहळा २०२६’ पुण्यात उत्साहपूर्ण वातावरणात पार पडला. कृषी क्षेत्र, समाजकार्य, ग्रामीण विकास तसेच शेतीसंबंधित विविध क्षेत्रांमध्ये उल्लेखनीय कार्य करणाऱ्या व्यक्तींना यावेळी सन्मानित करण्यात आले.
या सोहळ्याला प्रमुख पाहुण्या म्हणून सिने अभिनेत्री नेहा पटिले आणि अपूर्वा परदेशी उपस्थित होत्या. त्यांच्या उपस्थितीमुळे कार्यक्रमाला विशेष आकर्षण लाभले.
संस्थेचे अध्यक्ष गणेश रामदास विटकर यांच्या नेतृत्वाखाली हा कार्यक्रम यशस्वीरीत्या पार पडला. यावेळी स्वप्निल पवार (वन वे इंटरटेनमेंट), कृषी अधिकारी एस. एस. सावंत यांच्यासह अनेक उद्योजक, कृषी तज्ज्ञ आणि सामाजिक कार्यकर्ते मोठ्या संख्येने उपस्थित होते.
महाराष्ट्रातील विविध जिल्ह्यांमधून सेंद्रिय शेती, शाश्वत शेती पद्धती, जलसंधारण, पशुपालन, महिलांचे सक्षमीकरण आणि कृषी उद्योजकता या क्षेत्रांत उल्लेखनीय कार्य करणाऱ्या व्यक्तींना ‘राष्ट्रीय गौरव पुरस्कार २०२६’ देऊन गौरविण्यात आले.
यावेळी बोलताना अध्यक्ष गणेश विटकर म्हणाले, “महाराष्ट्रातील प्रत्येक शेतकरी हा आपल्या देशाचा खरा हिरो आहे. त्यांच्या अथक परिश्रमामुळे समाजाची प्रगती आणि अन्नसुरक्षा शक्य झाली आहे. शेतकऱ्यांचा सन्मान करणे हे आमचे कर्तव्य आणि अभिमान आहे.”
या कार्यक्रमादरम्यान शेतकऱ्यांसाठी मोफत मार्गदर्शन शिबिरे, कृषी उद्योजकतेसाठी प्रशिक्षण कार्यशाळा, विद्यार्थ्यांसाठी अॅग्री-इनोव्हेशन स्पर्धा तसेच राज्यभर ‘शेती प्रेरणा अभियान’ राबवण्याची घोषणाही करण्यात आली.
एकूणच, हा सोहळा केवळ पुरस्कार वितरणापुरता मर्यादित न राहता कृषी क्षेत्राला नवी दिशा देणारा आणि शेतकऱ्यांच्या कर्तृत्वाचा गौरव करणारा प्रेरणादायी उपक्रम ठरला.
