दिग्दर्शक Aditya Dhar यांचा बहुचर्चित चित्रपट Dhurandhar: The Revenge लवकरच प्रदर्शित होणार असून १९ मार्च रोजी हा सिनेमा प्रेक्षकांच्या भेटीला येणार आहे. धुरंधर मालिकेचा हा दुसरा भाग पाहण्यासाठी सिनेप्रेमींमध्ये मोठी उत्सुकता आहे. चित्रपटात कोणते नवे कलाकार दिसणार याबाबतही चर्चा रंगत आहे. दरम्यान, अभिनेत्री Yami Gautam आणि अभिनेता Vicky Kaushal यांच्या कॅमिओची चर्चा सुरू असतानाच अभिनेता Anil Kapoor यांनी एक महत्त्वाचा खुलासा केला आहे.
अनिल कपूर सध्या Subedaar या चित्रपटामुळे चर्चेत आहेत. नुकत्याच दिलेल्या एका मुलाखतीत त्यांनी सांगितले की, आदित्य धर यांनी त्यांना धुरंधर: द रिव्हेंजमध्ये छोट्या कॅमिओ भूमिकेसाठी विचारणा केली होती. मात्र आधीच इतर चित्रपटांसाठी दिलेल्या तारखांमुळे त्यांनी ही ऑफर नम्रपणे नाकारली.
अनिल कपूर म्हणाले की, “माझ्या कारकिर्दीत प्रोफेशनलिझम आणि कमिटमेंट यांना नेहमीच महत्त्व दिले आहे. केवळ टॅलेंटमुळे यश मिळत नाही, तर दिलेल्या शब्दालाही तेवढेच महत्त्व असते. त्या वेळी मी इतर चित्रपटांसाठी आधीच तारखा दिल्या होत्या. त्यामुळे मला हा कॅमिओ करायची इच्छा असूनही स्वीकारता आला नाही.”
ते पुढे म्हणाले की, “मी आदित्यला स्पष्ट सांगितले की भूमिका मला आवडली आहे, पण त्या वेळी माझे इतर प्रोजेक्ट सुरू होते. धुरंधर: द रिव्हेंज नक्कीच दमदार सिनेमा ठरेल. ही संधी गमावली हे माझेच नुकसान आहे.”
तसेच त्यांनी भविष्यात आदित्य धर यांच्यासोबत काम करण्याची इच्छा व्यक्त केली. “जर मी आधी आदित्यला तारखा दिल्या असत्या आणि त्यानंतर दुसऱ्या मोठ्या दिग्दर्शकाने ऑफर दिली असती, तरी मी आदित्यसोबतची कमिटमेंट पाळली असती. दिलेल्या तारखा रद्द करणे अनप्रोफेशनल असते. मात्र भविष्यात आदित्यसोबत एखाद्या नवीन प्रोजेक्टमध्ये काम करायला मला नक्की आवडेल,” असेही अनिल कपूर यांनी सांगितले.
