पुणे: समावेशकता आणि कौशल्य विकासाप्रती असलेल्या आपल्या सीएसआर वचनबद्धतेचा भाग म्हणून, हेन्केल इंडियाने मारुंजी येथील नवक्षितिजमध्ये नवीन कौशल्य विकास केंद्राचे उद्घाटन केले. हा प्रकल्प बौद्धिक आणि विकासात्मक दिव्यांग विद्यार्थ्यांसाठी स्टेम शिक्षण आणि कौशल्य विकासावर लक्ष केंद्रित करतो. हे केंद्र 10 वर्षे व त्यावरील वयाच्या व्यक्तींसाठी कार्यरत राहणार असून येथे सौरऊर्जा सुविधाही उभारण्यात आली आहे.
या केंद्रात विविध यंत्रसामग्री उपलब्ध असून त्याद्वारे विद्यार्थ्यांना अनेक व्यावहारिक कौशल्यांचे प्रत्यक्ष प्रशिक्षण दिले जाते. यामध्ये प्लेट बनवणे, कापूर बनवणे आणि अगरबत्ती बनवणे, तसेच वॉशिंग मशीन आणि इस्त्री उपकरणांच्या साहाय्याने कपडे धुणे व इस्त्री करणे यांचा समावेश आहे. विविध साच्यांच्या मदतीने विद्यार्थ्यांना पणत्या आणि मडकी बनवायलाही शिकता येते. स्टेम शिक्षण आणि जीवनकौशल्य विकासासोबतच हा प्रत्यक्ष अनुभव स्वावलंबन वाढवण्यासाठी, आत्मविश्वास निर्माण करण्यासाठी आणि सहभागी व्यक्तींना त्यांची पूर्ण क्षमता ओळखण्यास मदत करण्यासाठी तयार करण्यात आला आहे. पारंपरिक वर्गशिक्षणापलीकडे सातत्यपूर्ण शिक्षण आणि कौशल्य विकासाची असलेली महत्त्वाची गरज हा उपक्रम पूर्ण करतो. तसेच, यामुळे सहभागी व्यक्तींना उत्पादक उपक्रमांमध्ये सहभागी होता येते आणि समाजात अधिक सक्रियपणे सहभागी होण्याची त्यांची क्षमता बळकट होते.
परंपरागत शालेय शिक्षणानंतर सातत्यपूर्ण शिक्षण आणि कौशल्य विकासाच्या संधींची असलेली गरज लक्षात घेऊन हा उपक्रम राबविण्यात आला आहे. नियोजित प्रशिक्षण कार्यक्रम आणि प्रत्यक्ष अनुभव यांच्या माध्यमातून सहभागी व्यक्तींना उपयुक्त कौशल्ये आत्मसात करता येतील, उत्पादक उपक्रमांमध्ये सहभाग घेता येईल आणि समाजात अधिक सक्रियपणे योगदान देण्याची संधी मिळेल.
यावेळी बोलताना निलेश आर. अडकर, हेड – प्रॉडक्ट डेव्हलपमेंट, जनरल मॅन्युफॅक्चरिंग अँड मेंटेनन्स, हेन्केल ॲडहेसिव्ह टेक्नॉलॉजीज, आयएमईए, म्हणाले,”प्रत्येक व्यक्तीला शिकण्याची, प्रगती करण्याची आणि समाजात अर्थपूर्ण योगदान देण्याची संधी मिळाली पाहिजे. नवक्षितिजसोबतच्या आमच्या भागीदारीद्वारे आम्ही बौद्धिक आणि विकासात्मक दिव्यांग व्यक्तींमध्ये कौशल्य, आत्मविश्वास आणि स्वावलंबन जोपासणारे व्यासपीठ निर्माण करत आहोत. हे केंद्र सहभागी व्यक्तींना आपल्या क्षमतांचा शोध घेण्यास, नव्या संधी खुल्या करण्यास आणि अधिक परिपूर्ण जीवन जगण्यास सक्षम करेल, अशी आम्हाला आशा आहे.”
व्यावसायिक प्रशिक्षणाबरोबरच नव्याने विकसित करण्यात आलेले सभागृह सांस्कृतिक कार्यक्रम, सर्जनशील उपक्रम, सामुदायिक मेळावे आणि समूह सहभाग सत्रांसाठी बहुउद्देशीय जागा म्हणूनही वापरले जाईल. सहभागी व्यक्तींना शिकता येईल, एकत्र काम करता येईल, स्वतःला व्यक्त करता येईल आणि अर्थपूर्ण सामाजिक नाती जोडता येतील, असे समावेशक वातावरण निर्माण करण्याचे या केंद्राचे उद्दिष्ट आहे.
हेन्केल सीएसआर समितीचे सदस्य आणि पुणे साइट हेड डॉ. प्रसाद खंडागळे; रिजनल मॅनेजर्स प्रदीप कुमार वर्मा, डॉ. मिहिर पटेल, डॉ. मयूर चौधरी आणि हेन्केलच्या इतर कर्मचाऱ्यांच्या उपस्थितीत या केंद्राचे उद्घाटन करण्यात आले. यावेळी नवक्षितिजचे विश्वस्त श्रीमती स्मिता शेट्टी, पांडुरंग आळूरकर, बाळासाहेब वायाळ, प्रथमेश गड, विद्यार्थी आणि इतर लाभार्थी उपस्थित होते.
