प्रतिनिधी – मानस, बंगळुरू : रॉयल चॅलेंजर्स बंगळुरू (आरसीबी)चा स्टार फलंदाज विराट कोहली आणखी किमान चार वर्षे इंडियन प्रीमियर लीगमध्ये खेळत राहील, असा विश्वास संघाचे मुख्य कार्यकारी अधिकारी राजेश मेनन यांनी व्यक्त केला आहे. कोहली हा आरसीबीच्या ओळखीचा अविभाज्य भाग असून त्याच्याशिवाय संघाची कल्पनाही केलेली नसल्याचे त्यांनी स्पष्ट केले.
आयपीएल इतिहासातील सर्वाधिक धावा करणारा फलंदाज असलेल्या कोहलीने २०२६ हंगामातही शानदार कामगिरी कायम ठेवली. सलग चौथ्या हंगामात त्याने ६०० हून अधिक धावा करत सातत्याचे आणखी एक उदाहरण घालून दिले. तो आरसीबीच्या फलंदाजीचा मुख्य आधारस्तंभ राहिला आहे.
मेनन यांनी सांगितले की, संघातील अनेक महत्त्वाच्या निर्णयांमध्ये कोहलीचा सहभाग असतो. त्याचा अनुभव, नेतृत्वगुण आणि संघाशी असलेली निष्ठा आरसीबीसाठी अमूल्य आहे. त्यामुळे आगामी काही वर्षांतही तो संघाचा महत्त्वाचा भाग राहील, असा विश्वास व्यवस्थापनाला आहे.
२००८ पासून आरसीबीकडून खेळणारा कोहली हा संघाशी अखंड नाते जपणारा एकमेव खेळाडू आहे. आयपीएल २०२५ मध्ये संघाला पहिले विजेतेपद मिळवून देण्यात त्याची महत्त्वपूर्ण भूमिका होती, तर २०२६ मध्येही आरसीबीने विजेतेपदाची परंपरा कायम राखली.
वयाच्या उत्तरार्धातही कोहलीची तंदुरुस्ती, धावांची भूक आणि सातत्यपूर्ण कामगिरी पाहता तो पुढील काही हंगामांतही आयपीएलमध्ये चाहत्यांचे मनोरंजन करत राहील, अशी अपेक्षा क्रिकेट वर्तुळातून व्यक्त होत आहे.
