मुंबई, ११ मार्च २०२६ : मालाबार ग्रुपचे अध्यक्ष एम. पी. अहमद यांना लोकमत महाराष्ट्रीयन ऑफ द इयर अवॉर्ड २०२६ सोहळ्यात प्रतिष्ठेचा बिझनेस भूषण पुरस्कार प्रदान करण्यात आला. दागिने व्यवसाय क्षेत्रातील दूरदृष्टीपूर्ण नेतृत्व आणि जागतिक स्तरावर उद्योग उभारण्यात दिलेल्या योगदानाबद्दल त्यांना हा सन्मान देण्यात आला.
मुंबईतील ऐतिहासिक गेटवे ऑफ इंडिया येथे हा भव्य पुरस्कार सोहळा पार पडला. या कार्यक्रमाला महाराष्ट्राचे मुख्यमंत्री देवेंद्र फडणवीस, उपमुख्यमंत्री एकनाथ शिंदे, लोकमत समूहाचे अध्यक्ष विजय दर्डा तसेच विविध क्षेत्रांतील मान्यवर, उद्योगपती, प्रशासकीय अधिकारी आणि मनोरंजन क्षेत्रातील व्यक्ती उपस्थित होत्या.
लोकमत मीडिया समूहाकडून दिल्या जाणाऱ्या या पुरस्कारांद्वारे विविध क्षेत्रांमध्ये उल्लेखनीय कामगिरी करणाऱ्या व्यक्तींचा गौरव केला जातो. एम. पी. अहमद यांनी मालाबार गोल्ड अँड डायमंड्स या ब्रँडला जागतिक स्तरावर उभे करत भारतीय मूळ असलेला सर्वात मोठा ज्वेलरी रिटेलर आणि जगातील पाचव्या क्रमांकाचा ज्वेलरी रिटेलर बनवण्यात महत्त्वाची भूमिका बजावली आहे.
पुरस्कार स्वीकारताना एम. पी. अहमद म्हणाले की, “हा सन्मान मालाबार परिवाराच्या सामूहिक प्रयत्नांचे आणि ग्राहकांनी आमच्यावर ठेवलेल्या विश्वासाचे प्रतीक आहे. जबाबदारी, प्रामाणिकपणा आणि समाजासाठी मूल्य निर्माण करण्याच्या ध्येयाने आम्ही कार्य करत राहू.”
१९९३ मध्ये स्थापन झालेल्या मालाबार गोल्ड अँड डायमंड्सने पारदर्शक आणि जबाबदार ज्वेलरी रिटेल क्षेत्रात महत्त्वपूर्ण योगदान दिले आहे. आज कंपनीचे १४ देशांमध्ये ४२५ हून अधिक शोरूम्स असून ती जागतिक स्तरावर भारतीय हस्तकलेचा ठसा उमटवत आहे.
महाराष्ट्र हा मालाबार गोल्ड अँड डायमंड्ससाठी महत्त्वाचा बाजार असून राज्यातील विविध शहरांमध्ये कंपनीची ३४ शोरूम्स कार्यरत आहेत. आगामी काळात २०२९ पर्यंत महाराष्ट्रात ६४ शोरूम्स सुरू करण्याचे कंपनीचे लक्ष्य आहे.
व्यवसायाबरोबरच सामाजिक बांधिलकी जपत मालाबार ग्रुप शिक्षण, आरोग्य, निवास, भूक निर्मूलन आणि महिला सक्षमीकरणासाठी सातत्याने कार्य करत आहे. कंपनी आपल्या नफ्याच्या ५ टक्के रक्कम सामाजिक उपक्रमांसाठी खर्च करते.
