Pune Kolhapur Highway : पुणे-कोल्हापूर महामार्गावर (Pune-Kolhapur Highway) रविवारी दुपारी एक गंभीर घटना घडली. ऑइलने भरलेल्या (MH05AM1940) टँकरला जांभुळवाडी परिसरात (Jambhulwadi) अचानक आग लागली. ज्वलनशील द्रव्यांनी भरलेल्या टँकरला आग लागल्याने काही काळ परिसरात भीतीचे वातावरण निर्माण झाले.
घटनेची माहिती मिळताच पोलिसांनी तातडीने घटनास्थळी धाव घेतली. काही मिनिटांत अग्निशामक दलाच्या गाड्याही दाखल झाल्या. यावेळी NHAI चे कर्मचारी आणि ॲम्बुलन्स सेवाही सज्ज ठेवण्यात आली होती. सुदैवाने या अपघातात कोणतीही जीवितहानी झाली नाही. टँकर चालक आणि कर्मचारी सुरक्षित बाहेर पडले.
अग्निशामक दलाने आग वेगाने नियंत्रणात आणत टँकर पूर्णतः विझवला. त्यानंतर क्रेनच्या सहाय्याने टँकर सुरक्षित स्थळी हलवण्यात आला. घटनेमुळे महामार्गावर काही वेळ वाहतूक विस्कळीत झाली, परंतु पोलिसांनी पर्यायी व्यवस्था करून परिस्थिती हाताळली.
या प्रसंगात पोलिस आणि अग्निशामक दलाच्या तत्परतेमुळे मोठा अनर्थ टळला. नागरिक आणि वाहनचालकांनी या जलद कारवाईचे कौतुक केले.
