प्रतिनिधी – मानस : तामिळनाडूचे नवनिर्वाचित मुख्यमंत्री थलपती विजय हे देशातील दुसऱ्या क्रमांकाचे सर्वात श्रीमंत मुख्यमंत्री ठरले आहेत. त्यांच्या मालमत्तेची एकूण किंमत तब्बल ६४८.८५ कोटी रुपये असल्याची माहिती निवडणूक शपथपत्रातून समोर आली आहे. मात्र, देशातील सर्वात श्रीमंत मुख्यमंत्री म्हणून आंध्र प्रदेशचे मुख्यमंत्री एन. चंद्रबाबू नायडू यांचे नाव पहिल्या क्रमांकावर आहे.
तामिळनाडूमध्ये सर्वाधिक संपत्ती असलेल्या आमदारांच्या यादीत एआयएडीएमकेच्या लीमा रोझ मार्टिन या अव्वल स्थानावर आहेत. त्यांच्याकडे ५,८६३ कोटी रुपयांची संपत्ती आहे. तर थलपती विजय दुसऱ्या क्रमांकावर असून, त्यांच्या पक्षातील टीव्हीकेचे आमदार आधव अर्जून तिसऱ्या स्थानावर आहेत. त्यांच्या मालमत्तेची किंमत ५३४ कोटी रुपये असल्याचे सांगितले जाते.
विजय यांच्याकडे काय आहे?
थलपती विजय यांच्या संपत्तीत ४२६.२० कोटी रुपयांची चल मालमत्ता आणि २२२.६५ कोटी रुपयांची अचल मालमत्ता समाविष्ट आहे. याशिवाय त्यांच्यावर ७.६३ कोटी रुपयांचे कर्जही आहे.
विजय यांनी ३३०.४८ कोटी रुपये बँकांमध्ये गुंतवले आहेत. तसेच १९.३७ लाख रुपयांचे शेअर्स असून, त्यांनी ७५.५० कोटी रुपयांहून अधिक रक्कम कर्ज स्वरूपात दिल्याचेही नमूद करण्यात आले आहे.
वाहनांच्या बाबतीतही विजय यांचे कलेक्शन चर्चेत आहे. त्यांच्या ताफ्यात १३.५२ कोटी रुपयांपेक्षा अधिक किमतीच्या सात आलिशान गाड्या आहेत. त्यातील सर्वात महागडी ‘टाटा कॅराव्हॅन’ कार असून तिची किंमत ६ कोटी रुपयांपेक्षा जास्त आहे. याशिवाय त्यांच्या नावावर ६.४७ कोटी रुपयांचे सोन्या-चांदीचे दागिने आहेत.
११ बंगले आणि कोट्यवधींची मालमत्ता
विजय यांच्या अचल संपत्तीत ११७ कोटी रुपयांचे बंगले आहेत. त्यांच्या नावावर १० तर पत्नीच्या नावावर एक बंगला आहे. याशिवाय ८२.८१ कोटी रुपयांची व्यावसायिक इमारत, २२ कोटी रुपयांची जमीन आणि २० लाख रुपयांची शेती जमीनही त्यांच्या मालकीची आहे.
चंद्रबाबू नायडू पहिल्या क्रमांकावर
आंध्र प्रदेशचे मुख्यमंत्री चंद्रबाबू नायडू हे देशातील सर्वात श्रीमंत मुख्यमंत्री आहेत. त्यांच्या एकूण मालमत्तेची किंमत ९३१.८३ कोटी रुपये आहे. त्यांच्याकडे ८१०.४२ कोटी रुपयांची चल मालमत्ता आणि १२१.४१ कोटी रुपयांची अचल मालमत्ता आहे. त्यांच्यावर १०.३८ कोटी रुपयांचे कर्ज असल्याची माहितीही शपथपत्रातून समोर आली आहे.
२०२४ च्या विधानसभा निवडणूक शपथपत्रानुसार, नायडू यांच्याकडे ७६७.४४ कोटी रुपयांचे शेअर्स आणि बाँड्स आहेत. तसेच ३.२४ कोटी रुपयांचे दागिने, ५५ कोटी रुपयांची शेती जमीन, ७७.३३ लाख रुपयांचे प्लॉट, ३० कोटी रुपयांहून अधिक किमतीच्या व्यावसायिक इमारती आणि ३५.५३ कोटी रुपयांचे दोन बंगले आहेत.
