रील्स, व्हिडीओ आणि प्रमोशनल साहित्य तयार करणाऱ्यांना चाकणकरांचा सज्जड दम; नेमका रोख कुणाकडे? राजकीय वर्तुळात चर्चांना उधाण!
पुणे : राजकारणात नेत्यांच्या नावाचा, फोटोचा आणि व्यक्तिमत्त्वाचा वापर करून सोशल मीडियावर प्रसिद्धी मिळविण्याचे प्रकार काही नवीन नाहीत. मात्र, आता राष्ट्रवादी काँग्रेस (अजित पवार) पक्षाच्या नेत्या तथा राज्य महिला आयोगाच्या माजी अध्यक्षा रुपाली चाकणकर यांनी याच प्रकाराला थेट कायदेशीर चौकटीत आणण्याचा पवित्रा घेतला आहे. आपले नाव, छायाचित्र, ओळख आणि अगदी वैयक्तिक शैलीचीही ट्रेडमार्क नोंदणी केल्याची माहिती त्यांनी स्वतः सोशल मीडियावरून दिली आहे. एवढेच नव्हे, तर पूर्वपरवानगीशिवाय या गोष्टींचा व्यावसायिक किंवा वैयक्तिक फायद्यासाठी वापर करणाऱ्यांना फौजदारी आणि दिवाणी कारवाईचा इशाराही दिला आहे. त्यामुळे चाकणकरांच्या या नव्या भूमिकेची राजकीय वर्तुळात जोरदार चर्चा सुरू झाली आहे.
नावापासून स्टाइलपर्यंत सगळ्यावर हक्क सांगितला!
रुपाली चाकणकर यांनी ‘एक्स’ (पूर्वीचे ट्विटर) या सोशल मीडिया प्लॅटफॉर्मवर पोस्ट करत आपल्या ट्रेडमार्क नोंदणीबाबत माहिती दिली. त्यानुसार, त्यांचे नाव, फोटो, वैयक्तिक ओळख, विशिष्ट शैली आणि स्वतःला सादर करण्याची पद्धत यासंदर्भात ट्रेडमार्क नोंदणी करण्यात आली आहे.
त्यांच्या पूर्वपरवानगीशिवाय कोणीही या गोष्टींचा वापर करून स्वतःच्या फायद्यासाठी किंवा व्यावसायिक उद्देशाने फोटो, व्हिडीओ, फिल्म, रील्स, टीझर, प्रमोशनल साहित्य अथवा अन्य कोणतीही सामग्री तयार करू नये, वापरू नये किंवा प्रसिद्ध करू नये, असे त्यांनी स्पष्ट केले आहे.
रील्स बनवणाऱ्यांनो, जरा जपून!
सोशल मीडियावर एखाद्या नेत्याचे फोटो वापरून रील्स बनवणे, त्यांच्याशी संबंधित व्हिडीओ तयार करणे किंवा त्यांच्या नावाचा वापर करून प्रमोशन करणे हे प्रकार सर्रास घडतात. मात्र, आता अशा प्रकारांना आळा घालण्यासाठी चाकणकरांनी कायदेशीर कारवाईचा इशारा दिला आहे.
अनधिकृतपणे तयार केलेले आक्षेपार्ह किंवा बेकायदेशीर साहित्य जप्त करण्याची मागणी केली जाईल. तसेच संबंधित व्यक्तींना फौजदारी आणि दिवाणी स्वरूपाच्या कायदेशीर कारवाईला सामोरे जावे लागू शकते, असे त्यांनी आपल्या पोस्टमध्ये नमूद केले आहे.
नेमका इशारा कुणाला? चर्चांना उधाण!
चाकणकरांनी ही ट्रेडमार्क नोंदणी नेमकी कोणत्या कारणासाठी केली, याचा खुलासा मात्र आपल्या पोस्टमध्ये केलेला नाही. तसेच त्यांच्या नावाचा किंवा फोटोचा गैरवापर करणारी एखादी विशिष्ट व्यक्ती अथवा संस्था त्यांच्या निशाण्यावर आहे का, हेही स्पष्ट झालेले नाही. त्यामुळे या पोस्टमागील नेमकी पार्श्वभूमी काय, त्यांचा रोख कुणाकडे आहे आणि अलीकडील घडामोडींशी याचा काही संबंध आहे का, याबाबत राजकीय वर्तुळात तर्कवितर्कांना उधाण आले आहे.
महिला आयोगाच्या राजीनाम्यानंतर नवी चर्चा!
दरम्यान, भोंदू अशोक खरात प्रकरणामुळे चर्चेत आलेल्या रुपाली चाकणकर यांनी काही महिन्यांपूर्वी राज्य महिला आयोगाच्या अध्यक्षपदाचा राजीनामा दिला होता. त्यानंतर राष्ट्रवादी काँग्रेस (अजित पवार) पक्षाच्या महिला प्रदेशाध्यक्षपदाचाही राजीनामा दिल्याचे समोर आले होते.
या पार्श्वभूमीवर आता स्वतःच्या नावापासून वैयक्तिक शैलीपर्यंत ट्रेडमार्क नोंदणी केल्याची घोषणा करून चाकणकरांनी नवी चर्चा छेडली आहे. राजकारणात प्रतिमा जपण्याची धडपड असतेच; पण आता त्या प्रतिमेच्या वापरालाही कायदेशीर संरक्षण देण्याचा त्यांचा प्रयत्न चर्चेचा विषय ठरत आहे.
एकूणच, चाकणकरांच्या या ट्रेडमार्क घोषणेमुळे सोशल मीडियावरील फोटो, व्हिडीओ आणि रील्सच्या वापराबाबत नवा प्रश्न ऐरणीवर आला आहे. आता त्यांच्या इशाऱ्यानंतर प्रत्यक्षात कोणावर आणि कधी कायदेशीर कारवाई होते, याकडे सर्वांचे लक्ष लागले आहे.
