नवी दिल्ली, 21 मे 2026 : भारती एअरटेलने ‘प्रायोरिटी पोस्टपेड’ ही नवी सेवा सुरू केली असून, 5G स्लायसिंग तंत्रज्ञानाच्या मदतीने पोस्टपेड ग्राहकांना अधिक वेगवान, स्थिर आणि अखंड नेटवर्क अनुभव देण्याचा दावा केला आहे. काम, मनोरंजन तसेच ऑनलाइन सहकार्यासाठी सातत्यपूर्ण कनेक्टिव्हिटीची गरज असलेल्या ग्राहकांना लक्षात घेऊन ही सेवा विकसित करण्यात आली आहे.
या सेवेसाठी एअरटेलने आपल्या 5G नेटवर्कमध्ये प्रगत स्लायसिंग तंत्रज्ञानाचा वापर करून सुधारणा केली आहे. या तंत्रज्ञानामुळे नेटवर्कची क्षमता अधिक कार्यक्षम पद्धतीने विभागता येते आणि प्रायोरिटी ग्राहकांना उच्च दर्जाचा अनुभव देता येतो. विशेषतः गर्दीच्या भागात किंवा नेटवर्क ट्रॅफिक वाढलेल्या परिस्थितीतही पोस्टपेड ग्राहकांना स्थिर आणि विश्वासार्ह कनेक्टिव्हिटी मिळणार आहे.
अमेरिका, सिंगापूर, युनायटेड किंगडम आणि मलेशिया यांसारख्या देशांमध्ये गेल्या काही काळात स्लायसिंग-आधारित 5G सेवा सुरू करण्यात आल्या आहेत. भारतात अशा प्रकारची सेवा सुरू करणारी एअरटेल ही पहिली कंपनी ठरली आहे. कंपनीच्या मते, ही सेवा अधिक स्मार्ट आणि भविष्यकालीन डिजिटल नेटवर्क उभारण्याच्या दिशेने महत्त्वाचे पाऊल आहे.
या लाँचबाबत बोलताना एअरटेलचे मुख्य कार्यकारी अधिकारी शश्वत शर्मा म्हणाले, “ग्राहकांचा अनुभव अधिक समृद्ध करण्यासाठी अर्थपूर्ण नवकल्पना आणण्यावर आमचा भर आहे. ‘प्रायोरिटी पोस्टपेड’ सेवा ग्राहकांना गर्दीच्या ठिकाणी, प्रवासात किंवा ऑनलाइन संवादादरम्यान अधिक विश्वासार्ह आणि अखंड नेटवर्क अनुभव देईल.”
एअरटेलची ‘प्रायोरिटी’ सेवा कंपनीच्या सर्व पोस्टपेड प्लॅन्समध्ये उपलब्ध करण्यात आली आहे. विद्यमान पोस्टपेड ग्राहकांना हा लाभ आपोआप मिळणार असून, प्रीपेड ग्राहक किंवा पोस्टपेडमध्ये स्विच करू इच्छिणारे ग्राहक एअरटेल अॅप किंवा जवळच्या एअरटेल स्टोअरद्वारे ही सेवा सुरू करू शकतात.
प्रायोरिटी पोस्टपेड प्लॅन्स
- ₹449 + GST (वैयक्तिक प्लॅन)
फास्टलेन तंत्रज्ञानासह 5G प्रायोरिटी सेवा, अमर्यादित डेटा व कॉलिंग, 3000 SMS, फसवणूक शोध आणि स्पॅम अलर्ट सेवा. यासोबत Airtel Xstream Play, Adobe Express Premium आणि 100 GB क्लाउड स्टोरेज सुविधा. - ₹699 + GST (2 सदस्यांचे कुटुंब)
वरील सर्व सुविधांसह Amazon Prime आणि Jio Hotstar सदस्यत्व. - ₹999 + GST (3 सदस्यांचे कुटुंब)
वरील सर्व सुविधांसह Apple TV आणि Apple Music. - ₹1199 + GST (4 सदस्यांचे कुटुंब)
- ₹1749 + GST (5 सदस्यांचे कुटुंब)
वरील सर्व सुविधांसह Netflix सदस्यत्व.
कंपनीने स्पष्ट केले की, ग्राहकांना ही सेवा 5G SA सक्षम स्मार्टफोन आणि नवीनतम सॉफ्टवेअर अपडेटसह वापरता येईल. फोनमध्ये आवश्यक अपडेट प्रलंबित असल्यास त्याची सूचना ‘सेटिंग्ज’मध्ये दिसेल. तसेच ग्राहक एअरटेल अॅपवर लॉग इन करून त्यांच्या डिव्हाइसची ‘एअरटेल प्रायोरिटी’ सेवेसाठीची तयारी तपासू शकतात.
