MNS Candidates List : मोठी बातमी! अखेर मनसेकडून उमेदवारांची पहिली यादी जाहीर, ३३ शिलेदारांना संधी; कुणा-कुणाचे नाव?

MNS Candidates List : मुंबई महानगर पालिकेसाठी शिवसेना ठाकरे गट, काँग्रेस आणि भाजपपाठोपाठ आता मनसेने उमेदवारांची पहिली यादी जाहीर केली. रात्री उशिरा मनसेकडून ३३ उमेदवारांची यादी जाहीर करण्यात आली. या यादीमध्ये मनसेने मुंबईतील वॉर्ड क्रमांक १० पासून सुरूवात केली. उमेदवारांना थेट एबी फॉर्म दिले जाणार अशी घोषणा राज ठाकरे यांनी सोमवारी केली होती.

शिवसेना ठाकरे गट आणि मनसे यांची मुंबई महानगर पालिका निवडणुकीसाठी युती झाली आहे. दोन्ही पक्ष युतीतून ही निवडणूक लढवणार आहेत. शिवसेना ठाकरे गटाने आपली पहिली यादी सोमवारी सकाळी जाहीर केली. त्यानंतर रात्री उशिरा मनसेकडून देखील उमेदवारांची यादी जाहीर करण्यात आली. मनसेने इच्छुक उमेदवारांना एबी फॉर्म देखील दिले आहेत. मनसेने आपल्या पहिल्या यादीमध्ये ३ अमराठी उमेदवारांना संधी दिली आहे. यामध्ये सोनाली देव मिश्रा, शबनम शेख आणि हरिनाक्षी मोहन चिराथ या उमेदवारांचा समावेश आहे. तर उर्वरीत सर्व उमेदवार हे मराठी आहेत.

आज उमेदवारी अर्ज दाखल करण्याची शेवटची तारीख आहे. त्यामुळे इच्छुक उमेदवारांना अर्ज दाखल करण्यासाठी आता काही तास शिल्लक राहिले आहेत. मनसेने आता फक्त ३३ उमेदवारांची यादी जाहीर केली आहे. लवकरच ते उर्वरीत उमेदवारांची यादी जाहीर करण्याची शक्यता आहे. मुंबई महानगर पालिकेवर मराठी माणूस महापौर व्हावा आणि आपली सत्ता यावी यासाठी ठाकरे बंधूंनी कंबर कसली आहे. मुंबई महानगर पालिकेसाठी येत्या १५ जानेवारी रोजी मतदान होणार असून दुसऱ्या दिवशी म्हणजे १६ जानेवारीला निकाल जाहीर होईल.