नवी मुंबई (Navi Mumbai Crime) : उलवे भागात राहणाऱ्या सुरेंद्र पांडे, 43 वर्ष, याच्या हत्याप्रकरणी उलवे पोलिसांनी मागील महिन्यात अटक केलेला आरोपी विशाल संजय शिंदे, 21 वर्ष, याच्यावर अल्पवयीन मैत्रिणीवर बलात्कार केल्याप्रकरणी बलात्कार आणि पोक्सो कायद्याच्या अंतर्गत गुन्हा दाखल करण्यात आला आहे. अल्पवयीन तरुणी गर्भवती असून ती सध्या रुग्णालयात दाखल आहे.
संगमनेर येथे राहणारा आरोपी विशाल याची काही महिन्यांपूर्वी या 17 वर्षीय मुलीसोबत इन्टाग्रामवरुन ओळख झाली होती. आरोपीने तिला लग्नाचे आमिष दाखवत नाशिक, संगमनेर येथे नेऊन तिच्यासोबत शरीरसंबंध ठेवले होते.
दरम्यान, मार्च महिन्यात ही मुलगी नवी मुंबई येथे नोकरीच्या शोधात आली होती. त्यावेळी तिची उलवे येथील टॅक्सी चालक सुरेंद्र पांडे याच्याशी ओळख झाली. पांडे याने तिला नोकरी देण्याचे आश्वासन देऊन आपल्या घरामध्ये राहण्यास अनुमती दिली.
दरम्यानच्या काळात मुलीने विशाल याला उलवे येथे बोलावून घेतले. पांडे याने या अल्पवयीन मुलीकडे शरीरसुखाची मागणी केल्यामुळे झालेल्या वादातून, विशाल आणि संबंधित अल्पवयीन मुलीने दोन एप्रिल रोजी पांडे याच्या डोक्यावर हातोडीने हल्ला करून त्याची हत्या केली. तसेच मृतदेह चादरीत बांधून घराला टाळे लावून त्याची कार घेऊन पळ काढला होता.
त्यानंतर विशालच्या कुटुंबियांनी पोलिसांत हजर होण्याचा सल्ला दिल्यानंतर ते दोघे संगमनेर पोलिस ठाण्यात हजर झाले. त्यानंतर उलवे पोलिसांनी संगमनेर येथे जाऊन विशाल व त्याच्या अल्पवयीन मैत्रिणीला ताब्यात घेतले.
पोलिस तपासात विशालची मैत्रीण गर्भवती असल्याचे आढळले. विशालने अल्पवयीन मुलीला लग्नाचे आमिष दाखवून शरीरसंबंध ठेवल्याचे, तसेच त्यामुळे ती गर्भवती राहिल्याचे उघडकीस आल्यानंतर आरोपी विशालविरोधात हत्येपाठोपाठ बलात्कार आणि पोक्सोअंतर्गत गुन्हा दाखल करण्यात आल्याची माहिती पोलिस निरीक्षक (गुन्हे) अश्विनी पाटील यांनी दिली. आरोपी विशाल तळोजा कारागृहात न्यायालयीन कोठडीत असून त्याची अल्पवयीन मैत्रीण रुग्णालयात दाखल आहे.
