Pune Rain Update : पुण्यात पुढील दोन दिवसांसाठी मुसळधार पावसाचा इशारा; ‘ऑरेंज अलर्ट’ जाहीर
पुणे (प्रतिनिधी) – मागील काही दिवसांपासून मॉन्सूनपूर्व पावसाने पुणे शहर आणि जिल्ह्यात चांगलाच कहर केला असून, हवामान विभागाने पुढील दोन दिवसांसाठी (ता. २३ व २४ मे) ‘ऑरेंज अलर्ट’ जारी केला आहे. त्यामुळे नागरिकांनी सतर्क राहण्याचे आवाहन प्रशासनाकडून करण्यात आले आहे.
भारतीय हवामानशास्त्र विभागानुसार, शुक्रवार आणि शनिवारी पुण्यात मेघगर्जनेसह विजांचा कडकडाट, वादळी वारे आणि मुसळधार पावसाची शक्यता आहे. या दरम्यान ताशी ४० ते ५० किलोमीटर वेगाने वारे वाहू शकतात, असा अंदाज आहे.
पावसाचा कहर; नागरिक त्रस्त
गेल्या चार दिवसांपासून पुणे शहरात पावसाने सातत्य राखले असून, मंगळवारी शिवाजीनगरमध्ये ४०.५ मिमी, तर बुधवारी एनडीए परिसरात तब्बल १०३ मिमी पावसाची नोंद झाली. अनेक भागांत रस्ते जलमय झाले, झाडे कोसळली, फलक उडाले आणि दुचाकींचे नुकसान झाले. त्यामुळे शहरातील जनजीवन विस्कळीत झाले.
गुरुवारी उसंत, पण धोका कायम
गुरुवारी (ता. २२) पावसाचा जोर काहीसा ओसरल्यामुळे नागरिकांना थोडा दिलासा मिळाला. मात्र हवामान विभागाने दिलेल्या अलर्टमुळे सावधगिरी बाळगणे आवश्यक आहे. गुरुवारी पुण्यात कमाल तापमान ३१ अंश सेल्सिअस, तर किमान तापमान २२.६ अंश सेल्सिअस नोंदवण्यात आले.
रविवारीही पावसाची शक्यता
रविवारी (ता. २५) आकाश अंशतः ढगाळ राहणार असून मेघगर्जनेसह हलक्या ते मध्यम स्वरूपाचा पाऊस पडण्याची शक्यता वर्तवण्यात आली आहे. या दिवशी ताशी ३० ते ४० किलोमीटर वेगाने वारे वाहू शकतात.
तापमानाचा अंदाज (ता. २३ – २५):
-
शुक्रवार: कमाल – ३१°C, किमान – २२°C
-
शनिवार: कमाल – ३२°C, किमान – २२°C
-
रविवार: कमाल – सुमारे ३२°C, किमान – सुमारे २२°C
नागरिकांसाठी सूचना:
-
घराबाहेर पडताना आवश्यक ती खबरदारी घ्यावी.
-
विजांच्या गडगडाटाच्या वेळी सुरक्षित आश्रयस्थळी थांबावे.
-
पाण्याने भरलेल्या रस्त्यांपासून शक्यतो दूर राहावे.
-
वाहतुकीदरम्यान खबरदारी घ्यावी आणि प्रशासनाच्या सूचनांचे पालन करावे.
राज्य सरकारी कर्मचाऱ्यांसाठी आनंदाची बातमी; महागाई भत्तावाढीचा निर्णय…
