सर्वसामान्यांच्या आरोग्यसेवांसाठी झटणाऱ्या समवेदना संस्थेच्या २३ व्या वर्धापनदिनानिमित्त आयोजित व्याख्यानात कानिटकर बोलत होत्या. ‘जिद्द, शिस्त आणि आरोग्य – एका महिला जनरलचा यशस्वी मंत्र’, असा त्यांच्या व्याख्यानाचा विषय होता. एरंडवणे येथील आदर्श अभिनव सभागृहात झालेल्या कार्यक्रमावेळी लेफ्टनंट जनरल (निवृत्त) राजेंद्र कानिटकर, समवेदना संस्थेच्या सल्लागार समितीचे सदस्य राजीव साबडे, संस्थेचे व्यवस्थापक अमर पवार, प्रसिद्ध शिक्षणतज्ज्ञ डाॅ. राजा व रेणु दांडेकर उपस्थित होते. संस्थेचे हितचिंतक चंद्रकांत आरोळे आणि माधवी राऊत यांचा डाॅ. कानिटकर यांच्या हस्ते कृतज्ञता सत्कार करण्यात आला. संस्थेच्या अहवालाचे प्रकाशनही डाॅ. कानिटकर यांनी केले.
क्षेत्र कुठलेही असो, इच्छाशक्ती, त्यानुसार प्रयत्न, ध्येयाची नेमकी माहिती, बदलांचा स्वीकार, नवे शिकण्याची मानसिकता, कुटुंबियांचा पाठिंबा, शिस्तपालन, कामातली अचूकता, नेमकेपणा, नेतृत्वगुण, बुद्धी आणि भावनांचे संतुलन, विचार आणि कृती यातील समतोल, टीमवर्क करण्यावर भर असे गुणविशेष व्यक्ती म्हणून व्यावसायिक आणि वैयक्तिक जगातही आत्मसात करणे आवश्यक असते आणि हे साध्य करण्यासाठी तुमचे शारीरिक आरोग्य उत्तम ठेवणे गरजेचे असते, असे त्यांनी सांगितले.
राजीव साबडे यांनी संस्थेच्या कार्याची माहिती दिली. अमर पवार यांनी संस्थेच्या माध्यमातून होणार्या सेवाकार्याचे क्षेत्र व्यापक करण्याची योजना असल्याचे सांगितले. संस्थेची स्वतःची वास्तू, विद्यार्थ्यांचे मानसिक स्वास्थ्य, महिलांमधील आरोग्यविषयक जागरुकता यांबाबत गरजू रुग्ण आणि आरोग्यसेवा, यांच्यातील सेतू होण्याचे कार्य विस्तारण्याचा मनोदय त्यांनी व्यक्त केला. संस्थेचे दिवंगत अध्यक्ष नितीनभाई देसाई यांना श्रद्धांजली अर्पण करण्यात आली. विनया देसाई यांनी सूत्रसंचालन केले. मनोहर कलुंजे यांनी आभार मानले.
