बारामती/कलबुर्गी | प्रतिनिधी :- मानस : कर्नाटकातील कलबुर्गी जिल्ह्यात कौटुंबिक वादातून पतीने आपल्या २८ वर्षीय पत्नीची अमानुषपणे हत्या केल्याची हृदयद्रावक घटना समोर आली आहे. देवदर्शनासाठी गाणगापूरकडे जात असताना पती-पत्नीमध्ये वाद झाला आणि त्याचे रूपांतर गंभीर घटनेत झाले.
प्रवासादरम्यान बल्लुरगी गावाजवळ दोघांमध्ये जोरदार वाद झाला. वाद वाढत गेल्यानंतर पतीने पत्नीला कारमधून खाली ओढले आणि तिच्यावर गंभीर हल्ला केला. त्यानंतर तिला गंभीर जखमी अवस्थेत सोडून दिल्याने तिचा जागीच मृत्यू झाला.
ही घटना पाहून स्थानिक नागरिक तत्काळ मदतीसाठी धावले. काही काळ त्यांनी मध्यस्थी करून परिस्थिती नियंत्रणात आणण्याचा प्रयत्न केला. मात्र, परिस्थिती पुन्हा बिघडली. या संपूर्ण प्रकाराचे काही व्हिडिओ स्थानिकांनी मोबाईलमध्ये चित्रित केल्याची माहिती मिळत आहे.
प्राथमिक माहितीनुसार, पत्नीच्या चारित्र्यावर संशय असल्यामुळे पतीने हे टोकाचे पाऊल उचलल्याचा अंदाज व्यक्त केला जात आहे.
घटनेची माहिती मिळताच कर्नाटक पोलिसांनी घटनास्थळी पोहोचून आरोपी पतीला ताब्यात घेतले आहे. त्याच्यावर खुनाचा (कलम ३०२) गुन्हा दाखल करण्यात आला असून पुढील तपास सुरू आहे. पोलिसांच्या प्राथमिक तपासानुसार, ही घटना पूर्वनियोजित असण्याची शक्यता नाकारता येत नाही.
