पुणे: “समाजाचे शारीरिक आरोग्य चांगले राहण्यात डॉक्टरची भूमिका महत्वाची असते, तर देशाचे आर्थिक आरोग्य जपण्याचे दायित्व सनदी लेखापालांवर असते. सीए हे अर्थव्यवस्थेचे डॉक्टर आहेत. तुम्ही विद्यार्थी आता सीए म्हणून ही जबाबदारी निभावणार आहात. त्यामुळे याचे भान ठेवून नैतिकता, कौशल्यांचा विकास आणि प्रगत तंत्रज्ञानाचा अंतर्भाव करत नवनव्या गोष्टी शिकत सीए म्हणून तुमचे करिअर अधिक समृद्ध करा,” असे प्रतिपादन सिंबायोसिस आंतरराष्ट्रीय विद्यापीठाच्या प्रधान संचालिका डॉ. विद्या येरवडेकर यांनी केले.
दी इन्स्टिट्यूट ऑफ चार्टर्ड अकाउंटंट्स ऑफ इंडिया (आयसीएआय) नवी दिल्ली व ‘आयसीएआय’ पुणे शाखेच्या संयुक्त विद्यमाने आयोजित दीक्षांत समारंभात डॉ. येरवडेकर बोलत होत्या. बाणेर येथील बंटारा भवन येथे आयोजित समारंभावेळी ‘आयसीएआय’च्या केंद्रीय समितीचे सदस्य व समारंभाचे मुख्य समन्वयक सीए चंद्रशेखर चितळे, समन्वयक सीए उमेश शर्मा, विभागीय समिती सदस्य सीए अभिषेक धामणे, पुणे शाखेचे अध्यक्ष सीए सचिन मिणियार, उपाध्यक्ष सीए प्रणव आपटे, सचिव सीए निलेश येवलेकर, खजिनदार सीए नेहा फडके, कार्यकारिणी सदस्य सीए हृषिकेश बडवे आदी उपस्थित होते. एकूण १४०० विद्यार्थ्यांना सीए सभासदत्व देत पदवी प्रदान करण्यात आली.
डॉ. विद्या येरवडेकर म्हणाल्या, “आजचा सीए केवळ लेखापरीक्षणापुरता मर्यादित राहिलेला नाही. राष्ट्राच्या उभारणीत महत्त्वाचा धोरणात्मक भागीदार आहे. जागतिक स्तरावर स्पर्धात्मक राहण्यासाठी आर्थिक ज्ञानासोबत तांत्रिक चपळतेची जोड आवश्यक आहे. कृत्रिम बुद्धिमत्ता (एआय) आणि डिजिटल पब्लिक इन्फ्रास्ट्रक्चर यांसारख्या आधुनिक तंत्रज्ञानाचा स्वीकार करण्याची गरज आहे.”
सीए चंद्रशेखर चितळे म्हणाले, “भारतीय चार्टर्ड अकाउंटंट्ससाठी जागतिक स्तरावर मोठ्या संधी उपलब्ध आहेत. ग्लोबल कॅपॅबिलिटी सेंटर्समध्ये (जीसीसी) भारतीय सीएंची वाढती मागणी असून, देशाच्या पाच ट्रिलियन डॉलर अर्थव्यवस्थेच्या दिशेने वाटचाल करताना तरुण सीएंनी प्रामाणिकपणा आणि नैतिकतेची कास धरावी.”
