पुणे, 19 मे 2025 — शहरातील उड्डाणपुलाखाली वाहन पार्किंग करणाऱ्या पुणेकरांना आता अडचणींचा सामना करावा लागणार आहे. महापालिकेच्या वाहतूक नियोजन विभागाने धायरी फाटा येथील उड्डाणपुलाखालील पार्किंग बंद केल्यानंतर, शहरातील इतर उड्डाणपुलांखालील पार्किंगवरही बंदी येण्याची शक्यता निर्माण झाली आहे.
पार्किंग बंदीचा फटका नागरिकांना
धायरी फाटा परिसरातील स्व. आमदार रमेश वांजळे उड्डाणपुलाखाली अनेक वर्षांपासून दुचाकी पार्किंग सुरू होते. धायरी, नर्हे परिसरातील रहिवासी, तसेच हिंजवडी आयटी पार्कमध्ये काम करणारे तरुण आपली वाहने येथे लावून प्रवास करत असत. मात्र, काही स्थानिकांनी तक्रार केल्यानंतर पालिकेने थेट पार्किंग बंद करून नागरिकांची गैरसोय केली आहे.
दारू पिणाऱ्यांमुळे पार्किंग बंद?
वाहतूक नियोजन विभागाचे प्रमुख अनिरुद्ध पावसकर यांनी सांगितले, “उड्डाणपुलाखाली काही लोक मद्यपान करत असल्याने सुरक्षेचा प्रश्न निर्माण झाला होता. त्यामुळे पोलिसांसोबत पाहणी करून पार्किंग बंद करण्याचा निर्णय घेतला.”
यावर अनेक नागरिकांचा संताप व्यक्त होत असून, “दारू पिणाऱ्यांवर कारवाई करण्याऐवजी वाहनचालकांना शिक्षा देण्यात आली”, असा आरोप होत आहे.
शहरातील इतर पार्किंगवरही टांगती तलवार
सध्या पुणे शहरात महापालिकेचे १८ पेक्षा अधिक उड्डाणपूल आहेत, आणि त्याखाली अनेक ठिकाणी दुचाकी व चारचाकी पार्किंग वापरली जात आहे. या जागांमुळे वाहतुकीला अडथळा होत नाही, तसेच वाहनेही सुरक्षित राहतात. मात्र, कुठल्याही पुलाखाली तक्रार आल्यास ती जागा पाहणी करून बंद केली जाऊ शकते, असे पावसकर यांनी स्पष्ट केले.
पार्किंग धोरणावर प्रश्नचिन्ह
महापालिकेचे पार्किंग धोरण अनेक वर्षांपासून अंमलात न आल्यामुळे, शहरातील रस्त्यावरची पार्किंग अराजकतेच्या स्थितीत आहे. वाहनचालकांना नो-पार्किंगमध्ये गाडी लावल्यास दंड भरावा लागतो, तर उड्डाणपुलाखालील सुरक्षित जागा बंद केली जात असल्याने नागरिकांमध्ये संभ्रम निर्माण झाला आहे.
धायरी फाटा पार्किंग बंद केल्यानंतर शहरातील उर्वरित उड्डाणपुलांखालील पार्किंग देखील धोक्यात येण्याची चिन्हं आहेत. वाहतूक समस्या गंभीर होत असताना नागरिक महापालिकेकडून सुस्पष्ट आणि प्रभावी पार्किंग धोरणाची अपेक्षा करत आहेत.
