📰 पुण्यात ‘पुणे ऑन पेडल्स’ सायकल रॅली आणि ‘पुणे वॉकेथॉन’चे शनिवारी आयोजन

खासदार प्रा. डॉ. मेधा कुलकर्णी यांचा पुढाकार; चार हजारांहून अधिक पुणेकरांचा सहभाग

पुणे: देशाचे पंतप्रधान नरेंद्र मोदी यांच्या ७५ व्या वाढदिवसाचे औचित्य साधून आरोग्याचे, पर्यावरणपूरक जीवनशैलीचे महत्व जनमानसात रुजवण्यासाठी भव्य सायकल रॅली आणि पुणे वॉकेथॉनचे आयोजन केले आहे. येत्या शनिवारी (ता. १३ सप्टेंबर २०२५) सकाळी ६ वाजता छत्रपती शिवाजी महाराज पुतळा कोथरूड येथून सायकल रॅली व वॉकेथॉनला सुरुवात होणार आहे. सायकल रॅलीची सांगता बालगंधर्व चौकातील झाशीची राणी पुतळ्याजवळ, तर वॉकेथॉनची सांगता एसएनडीटी महाविद्यालयाजवळ येथे होणार आहे.

राज्याच्या नगरविकास राज्यमंत्री माधुरी मिसाळ यांच्या हस्ते या रॅलीचे उद्घाटन होणार असून, पुणे महानगरपालिकेचे आयुक्त नवलकिशोर राम, महाराष्ट्र केसरी पैलवान शिवराज राक्षे व माजी आंतरराष्ट्रीय क्रिकेटपटू केदार जाधव यांची प्रमुख उपस्थिती असणार आहे. सायकल वापरण्यास प्रोत्साहन देण्याच्या उद्देशाने हा उपक्रम गेल्या सहा वर्षांपासून आयोजित केला जात आहे, अशी माहिती संयोजिका व राज्यसभा खासदार प्रा. डॉ. मेधा कुलकर्णी यांनी दिली.

प्रा. डॉ. मेधा कुलकर्णी म्हणाल्या, “पुणे हे सायकलचे शहर म्हणून ओळखले जाते. बहुगुणी अशी सायकल वापरणे आरोग्यासाठी लाभदायक आहे. यंदा सायकल रॅलीसह वॉकेथॉनचेही आयोजन केले आहे. या दोन्ही उपक्रमात साधारणपणे चार हजारपेक्षा अधिक पुणेकरांचा सहभाग राहणार आहे. रॅली व वॉकेथॉनमध्ये सहभागी प्रत्येकाला मेडल, प्रमाणपत्र आणि टी-शर्ट दिला जाणार आहे. अधिक माहिती व सहभागाकरिता संयोजन समितीतील प्रियांका (७७६७००८५००), निलेश मिसाळ (८३२९५७९६१२), किंवा कल्याणी टोकेकर (७४९९८५३९०५) यांच्याशी संपर्क साधावा.”