Pune News – शहरातील खराडी परिसरात रात्रीच्या वेळी घडलेल्या एका धक्कादायक प्रकाराने नागरिक संतप्त झाले आहेत. एका प्रेमयुगुलाने भर रस्त्यात धावत्या कारच्या छतावर बसून स्टंटबाजी आणि रोमान्स करत जीव धोक्यात घातला. या प्रकाराचा व्हिडिओ काही सेकंदांत सोशल मीडियावर व्हायरल झाला असून, पोलिसांकडे कठोर कारवाईची मागणी होत आहे.
मिळालेल्या माहितीनुसार, मुख्य रस्त्यावर सरळ वेगाने जात असताना तरुण आणि तरुणी वाहनाच्या रूफटॉपवर बसून रोमँटिक पोज देत होते. या कृतीमुळे रस्त्यावरून जाणाऱ्या वाहनचालकांचे लक्ष विचलित झाले. काही सेकंदांचा हा प्रसंग मोबाईल कॅमेऱ्यात कैद झाला आणि अल्पावधीतच सोशल मीडियावर पसरला.
वाहतूक नियमांचे उल्लंघन करणाऱ्या या बेजबाबदार वागणुकीवर नेटकऱ्यांनी संताप व्यक्त करत म्हटलं की, “हा प्रकार केवळ स्वतःच्या जीवाशी खेळणे नाही, तर इतरांच्या सुरक्षिततेलाही धोका निर्माण करणारा आहे.” अनेकांनी अशी बेपर्वाई जीवघेणी ठरू शकते, असेही मत व्यक्त केले.
कायद्यानुसार, सार्वजनिक रस्त्यावर किंवा प्रतिबंधित जागेत स्टंट करणे हा दंडनीय अपराध आहे. अशा कृतीसाठी दंड, तुरुंगवास किंवा दोन्ही शिक्षेची तरतूद आहे. स्टंटमुळे इतरांना इजा झाल्यास स्वतंत्र गुन्हा दाखल होऊ शकतो.
या घटनेनंतर वाहतूक नियमांचे पालन, रस्ते सुरक्षितता आणि सोशल मीडियासाठी जीव धोक्यात घालण्याच्या प्रवृत्तीवर पुन्हा एकदा गंभीर चर्चा सुरू झाली असून, नागरिकांनी पोलिसांनी तातडीने कठोर कारवाई करावी, अशी जोरदार मागणी केली आहे.
