मान्सूनची दमदार एन्ट्री; दक्षिण महाराष्ट्र आणि कोकणात पावसाचा जोर वाढणार

प्रतिनिधी – मानस, मुंबई : राज्यातील नागरिक ज्या मान्सूनची आतुरतेने वाट पाहत होते, त्या नैऋत्य मोसमी वाऱ्यांनी अखेर महाराष्ट्राच्या दिशेने वेगाने कूच केली आहे. केरळमध्ये 4 जून रोजी दाखल झालेला मान्सून आता तळकोकणाच्या उंबरठ्यावर पोहोचला असून पुढील दोन ते तीन दिवसांत मुंबईसह राज्यातील अनेक भागांत जोरदार पावसाची शक्यता हवामान विभागाने वर्तवली आहे.

गोवा, कर्नाटक आणि तामिळनाडूच्या काही भागांत मान्सूनचे आगमन झाल्यानंतर महाराष्ट्रातील वातावरणही अनुकूल बनले आहे. त्यामुळे कोकण आणि दक्षिण महाराष्ट्रात लवकरच मान्सूनचा पहिला दमदार पाऊस बरसण्याचा अंदाज आहे.

अनेक जिल्ह्यांना यलो अलर्ट

सध्या मध्य महाराष्ट्र, कोकण, मराठवाडा आणि विदर्भातील काही भागांत वादळी वाऱ्यांसह पावसाची स्थिती निर्माण झाली आहे. पुढील तीन ते चार दिवसांत दक्षिण कोकण आणि दक्षिण मध्य महाराष्ट्रात पावसाचा जोर वाढण्याची शक्यता आहे.

या पार्श्वभूमीवर हवामान विभागाने राज्यातील बहुतांश भागांसाठी यलो अलर्ट जारी केला आहे. काही ठिकाणी मेघगर्जनेसह हलका ते मध्यम स्वरूपाचा पाऊस पडण्याची शक्यता व्यक्त करण्यात आली आहे.

मुंबईला लवकरच पावसाची सर

हवामान विभागाच्या अंदाजानुसार, पुढील 48 तासांत कोकण किनारपट्टीवर मान्सून सक्रिय होईल. त्यानंतर मुंबई, ठाणे, रायगड आणि पालघर जिल्ह्यांमध्ये पावसाची तीव्रता वाढण्याची शक्यता आहे. त्यामुळे उष्णतेने हैराण झालेल्या नागरिकांना मोठा दिलासा मिळणार आहे.

विदर्भात अजून प्रतीक्षा

नागपूर हवामान विभागाचे तज्ज्ञ प्रवीण कुमार यांच्या माहितीनुसार, विदर्भात मान्सून साधारणतः 15 जूनच्या सुमारास दाखल होण्याची शक्यता आहे. तोपर्यंत या भागात 40 ते 42 अंश सेल्सिअस तापमान कायम राहू शकते.

दरम्यान, वर्धा, चंद्रपूर आणि यवतमाळ जिल्ह्यांसाठी अवकाळी पावसाचा ऑरेंज अलर्ट जारी करण्यात आला आहे. पुढील काही दिवसांत या भागांत वादळी वाऱ्यांसह पावसाच्या सरी कोसळण्याची शक्यता आहे.

यंदा मान्सून तीन दिवस उशिराने

सामान्यतः मान्सून 1 जून रोजी केरळमध्ये दाखल होतो. मात्र, यंदा तो तीन दिवस उशिराने म्हणजे 4 जून रोजी केरळमध्ये पोहोचला. तरीही पुढील वाटचालीसाठी वातावरण अनुकूल असल्याने मान्सूनचा प्रवास वेगाने सुरू असल्याचे हवामान विभागाने स्पष्ट केले आहे.

राज्यातील शेतकरी, नागरिक आणि प्रशासनाचे लक्ष आता मान्सूनच्या पुढील वाटचालीकडे लागले असून येत्या काही दिवसांत राज्यभरात पावसाचा जोर वाढण्याची शक्यता व्यक्त करण्यात येत आहे.