केंद्रीय माध्यमिक शिक्षण मंडळाकडून मोठा निर्णय घेण्यात आला आहे. मध्य पूर्वेतील युद्धामुळे बारावीच्या परीक्षा रद्द करण्यात आल्या आहेत. आज (ता. १५ ) ‘सीबीएसई’ने याबद्दलचे पत्रक प्रसिद्ध केले आहे. यामध्ये ‘सीबीएसई’ बोर्डाशी संलग्न असलेल्या बहरीन, इराण, कुवैत, ओमान, कतार, सौदी अरेबिया आणि यूएई देशांतील शाळांमधील १२ वी बोर्डाच्या परीक्षा रद्द करण्यात आल्या आहेत.
युद्धाची सुरुवात झाल्यानंतर यापूर्वी ‘सीबीएसई’ने १ मार्च २०२६ रोजी पहिले प्रसिद्धीपत्रक काढून परीक्षेची माहिती दिली होती. त्यानंतर युद्धाची तीव्रता पाहून नंतर चार वेळा या परीक्षांबद्दल विविध प्रसिद्धीपत्रके काढून माहिती दिली होती. अखेरच्या वेळी (९ मार्च) रोजी काढण्यात आलेल्या प्रसिद्धीपत्रकानुसार परीक्षा पुढे ढकलल्या होत्या. पण मध्य पूर्वेतील वाढता युद्धाचा आवाका पाहता अखेर बोर्डाकडून बारावीच्या परीक्षा रद्द करण्यात आल्या आहेत.
बोर्डाचा निर्णय पुढीलप्रमाणे
१. बहरीन, इराण, कुवेत, ओमान, कतार, सौदी अरेबिया आणि युएई येथील विद्यार्थ्यांच्या बाबतीत १६.०३.२०२६ ते १०.०४.२०२६ पर्यंत होणाऱ्या बारावीच्या सर्व परीक्षा रद्द करण्यात आल्या आहेत.
२. ०१.०३.२०२६, ०३.०३.२०२६, ०५.०३.२०२६, ०७.०३.२०२६ आणि ०९.०३.२०२६ च्या परिपत्रकानुसार यापूर्वी पुढे ढकलण्यात आलेल्या परीक्षा देखील रद्द केल्या जातील.
३. या देशांमधील बारावीच्या उमेदवारांसाठी निकाल जाहीर करण्याची द्धत योग्य वेळी स्वतंत्रपणे सूचित केली जाईल.
सात देशांतील परीक्षा रद्द
मध्यपूर्वेतील तणावपूर्ण परिस्थितीच्या पार्श्वभूमीवर केंद्रीय माध्यमिक शिक्षण मंडळाने (CBSE) बारावीच्या बोर्ड परीक्षांबाबत मोठा निर्णय घेतला आहे. बहरेन, इराण, कुवेत, ओमान, कतार, सौदी अरेबिया आणि संयुक्त अरब अमिराती या देशांमधील CBSE संलग्न शाळांमधील बारावीच्या परीक्षा रद्द केल्या आहेत. तसेच निकाल जाहीर करण्याची पद्धत लवकरच कळवण्यात येईल, अशी माहिती बोर्डाने दिली आहे.
यापूर्वी ‘सीबीएसई’ने ९ मार्च २०२६ रोजी जारी केलेल्या परिपत्रकानुसार, १२ मार्च २०२६ (गुरुवार) ते १६ मार्च २०२६ (सोमवार) दरम्यान होणाऱ्या परीक्षा स्थगित करण्यात आल्या होत्या. परिस्थितीचा आढावा घेतल्यानंतर विद्यार्थ्यांवर होणारा मानसिक ताण आणि निर्माण झालेली अनिश्चितता लक्षात घेऊन हा निर्णय घेण्यात आला होता. आता युद्ध स्थिती पाहता अखेर या परीक्षा रद्द करण्यात आल्या आहेत.
