Money Lending Law Update | सावकारी कायद्यात मोठा बदल
महाराष्ट्रात वाढत्या बेकायदेशीर सावकारीला आळा घालण्यासाठी राज्य सरकारने मोठे पाऊल उचलले आहे. महाराष्ट्र मनी लेंडिंग (नियमन) कायदा २०१४ अधिक कठोर करण्यासाठी त्यामध्ये सुधारणा करण्याची प्रक्रिया सुरू असल्याची घोषणा गृह राज्यमंत्री पंकज भोयर यांनी विधानसभेत केली.
चंद्रपूरमधील एका धक्कादायक घटनेनंतर सरकारने ही कारवाई हाती घेतली आहे. कर्जाच्या ओझ्याखाली दबलेल्या एका शेतकऱ्याला सावकारांच्या दबावामुळे परदेशात नेऊन किडनी विकावी लागल्याची घटना समोर आली होती. या प्रकरणात मूळ कर्ज रक्कम सुमारे ९.१५ लाख रुपये असताना संबंधित शेतकऱ्याने तब्बल ४८.५३ लाख रुपये परतफेड केली होती. तरीही सावकारांनी धमक्या देत त्याला कंबोडियातील नोम पेन्ह येथे नेल्याचा आरोप आहे.
या प्रकरणाचा तपास करण्यासाठी स्थापन करण्यात आलेल्या विशेष तपास पथकाने (SIT) आतापर्यंत आठ जणांना अटक केली आहे. अटक केलेल्या सावकारांकडे कोणताही वैध परवाना नसल्याचे स्पष्ट झाले असून त्यांच्या मालमत्ता जप्त करण्याची प्रक्रिया सुरू करण्यात आली आहे.
तपासादरम्यान उघड झालेल्या माहितीनुसार हे रॅकेट महाराष्ट्रापुरते मर्यादित नसून तामिळनाडूतील त्रिचीपासून कंबोडियापर्यंत पसरलेले आंतरराष्ट्रीय जाळे असल्याचे समोर आले आहे. सोलापूरमधील एका मध्यस्थाने या टोळीला किमान दहा जणांच्या अवयव विक्रीसाठी मदत केल्याचा संशय पोलिसांनी व्यक्त केला आहे.
गुन्ह्याचे गांभीर्य लक्षात घेता राज्य सरकार आता अशा बेकायदेशीर सावकारांवर मकोका (MCOCA) अंतर्गत गुन्हे दाखल करण्याचा विचार करत आहे. तसेच बेकायदेशीर सावकारी रोखण्यासाठी प्रत्येक जिल्ह्यात जिल्हाधिकारी यांच्या अध्यक्षतेखाली तीन सदस्यीय समित्या स्थापन करण्यात आल्या आहेत. या समित्या सावकारांवर थेट कारवाई करतील आणि दर तीन महिन्यांनी सरकारला प्रगती अहवाल सादर करतील.
भविष्यात सावकारांच्या जाळ्यात कोणताही शेतकरी अडकू नये आणि संघटित गुन्हेगारीला आळा बसावा, हा सरकारचा प्रमुख उद्देश असल्याचेही यावेळी स्पष्ट करण्यात आले.
