53 हून अधिक ठिकाणी ग्रंथ आणि सात्त्विक उत्पादन प्रदर्शनांचे आयोजन; जिज्ञासूंचा उत्स्फूर्त प्रतिसाद
पुणे – महाशिवरात्रीचे औचित्य साधून पुणे आणि पिंपरी-चिंचवड परिसरात सनातन संस्थेच्या वतीने भव्य स्तरावर धर्मप्रसार करण्यात आला. शिवभक्तांना शिवाची शास्त्रोक्त माहिती मिळावी आणि त्यांच्यामध्ये धर्माभिमान जागृत व्हावा, या उद्देशाने 53 हून अधिक ठिकाणी ग्रंथ प्रदर्शन, सात्त्विक उत्पादने आणि धर्मशिक्षण फलक लावून व्यापक अभियान राबवण्यात आले.
शिवपिंडीला अर्धप्रदक्षिणा का घालावी, बेल कसा अर्पण करावा, याविषयी फलक आणि हस्तपत्रकांद्वारे भाविकांचे प्रबोधन करण्यात आले. ओंकारेश्वर (शनिवार पेठ), मृत्युंजयेश्वर (कोथरूड), धायरेश्वर, नीलकंठेश्वर (हडपसर), यांसह अनेक प्रमुख मंदिरांमध्ये ही प्रदर्शने लावण्यात आली होती. विविध ठिकाणाच्या महादेव मंदिर कक्षाला आणि ग्रंथप्रदर्शनाला विविध क्षेत्रांतील मान्यवरांनी भेटी दिल्या. यामध्ये राज्यसभा खासदार प्रा. डॉ. (सौ.) मेधा कुलकर्णी, पिंपरी चिंचवड महापालिकेच्या नगरसेविका सौ. मनिषा योगेश चिंचवडे आणि सोबत श्री. योगेश चिंचवडे, भाजप नगरसेवक श्री. श्रीकांत जगताप, भाजपचे माजी प्रदेशाध्यक्ष अनुप मोरे, नगरसेविका मंजुश्री खर्डेकर आणि मंचरच्या प्रथम नगराध्यक्षा राजश्री गांजाळे यांचा समावेश होता. तसेच, वारकरी शिक्षण संस्थेचे संचालक ह.भ.प. बुवा पानसरे महाराज, आसामच्या कामाख्या देवी मंदिराचे मुख्य पुरोहित विजयघर शर्मा आणि पिंपरी-चिंचवडचे माजी महापौर राहुल जाधव यांनीही उपस्थिती लावून उपक्रमाचे कौतुक केले. ठिकठिकाणी प्रवचने आणि फलक लेखनाद्वारे भगवान शिवाचा महिमा सांगण्यात आला.
