प्रतिनिधी | मानस मते: हरियाणातील डबवाली येथील सावंतखेडा गावात पंजाबी गायक सिद्धू मूसेवालाच्या पुतळ्यावर अज्ञातांनी गोळीबार केल्याची धक्कादायक घटना उघडकीस आली आहे. या पुतळ्याची स्थापना जननायक जनता पार्टीचे (जेजेपी) प्रदेशाध्यक्ष दिग्विजय चौटाला यांच्या हस्ते करण्यात आली होती.
मूळ घटना काय?
प्राप्त माहितीनुसार, सावंतखेडा गावात उभारण्यात आलेल्या सिद्धू मूसेवालाच्या पुतळ्यावर काही अज्ञातांनी गोळीबार केला. या घटनेनंतर गावात तणावाचे वातावरण निर्माण झाले आहे. मूसेवालाची आई, चरण कौर यांनी या घटनेवर तीव्र प्रतिक्रिया दिली असून, “हा प्रकार म्हणजे माझ्या मुलाच्या मृत्यूचा अपमान आहे,” असे त्यांनी म्हटले आहे.
मूसेवालाच्या आत्म्यावर हल्ला
चरण कौर यांनी या घटनेनंतर सोशल मीडियावर भावना व्यक्त करताना म्हटले, “माझा मुलगा या जगात नाही, तरीही त्याच्या शत्रूंना शांती मिळत नाही. हा गोळीबार म्हणजे त्याच्या आत्म्यावर हल्ला आहे.”
लॉरेन्स बिश्नोई गँगचा हात?
हिंदुस्तान टाईम्सच्या अहवालानुसार, या गोळीबारानंतर दिग्विजय चौटालांना परदेशी क्रमांकावरून एक व्हिडीओ पाठवण्यात आला होता, ज्यामध्ये पुतळ्यावर गोळीबार होत असल्याचा थरकाप उडवणारा दृश्य होता. या घटनेची जबाबदारी लॉरेन्स बिश्नोई गँग ने घेतली आहे. त्यांनी स्पष्ट इशारा दिला आहे की, “सिद्धू मूसेवालाच्या विचारांना पाठिंबा देणाऱ्यांना लक्ष्य केलं जाईल.“
पोलिसांचा तपास सुरू
डबवाली पोलिसांनी या प्रकरणी गुन्हा दाखल केला असून तपास सुरू आहे. या घटनेमुळे राज्यभरात संतापाची लाट पसरली आहे.
मूळ हत्येची पार्श्वभूमी
स्मरणात ठेवावं, की सिद्धू मूसेवालाची 29 मे 2022 रोजी गोळ्या झाडून हत्या करण्यात आली होती. पंजाबच्या मानसा जिल्ह्यातील जवाहरके गावात कारमधून प्रवास करत असताना काही अज्ञातांनी त्याच्यावर अचानक गोळीबार केला होता. या हल्ल्यात त्याचा जागीच मृत्यू झाला होता.
ही घटना फक्त मूसेवालाच्या आठवणींवर नव्हे, तर विचारस्वातंत्र्यावरही थेट आघात करणारी आहे.
