🚗 वाहनधारकांसाठी मोठा दिलासा: HSRP लावण्याची मुदत ३० नोव्हेंबर २०२५ पर्यंत वाढवली

मुंबई – देशभरात १ एप्रिल २०१९ पासून नवीन वाहनांवर हाय सिक्युरिटी रजिस्ट्रेशन प्लेट (HSRP) बसवणे बंधनकारक आहे. जुन्या वाहनांसाठी यापूर्वी अंतिम तारीख १५ ऑगस्ट २०२५ ठरवण्यात आली होती. मात्र, वाहनधारकांचा कमी प्रतिसाद लक्षात घेऊन ही मुदत वाढवून ३० नोव्हेंबर २०२५ पर्यंत करण्यात आली आहे.

वाहनधारकांनी HSRP बसवण्यासाठी transport.maharashtra.gov.in या संकेतस्थळावर जाऊन अपॉइंटमेंट घ्यावी. ३० नोव्हेंबरपर्यंत अपॉइंटमेंट असलेल्या वाहनांवर कारवाई होणार नाही. परंतु, १ डिसेंबर २०२५ पासून HSRP न बसवलेल्या वाहनांवर वायुवेग पथक कारवाई करणार आहे.

सह परिवहन आयुक्त शैलेश कामत यांनी १ एप्रिल २०१९ पूर्वी नोंदणीकृत सर्व वाहनधारकांना HSRP बसवण्याचे आवाहन केले आहे.

🔍 HSRP म्हणजे काय आणि ती का आवश्यक?

• उच्च सुरक्षा प्लेट होलोग्राम स्टिकरसह येते.

• इंजिन व चेसिस क्रमांक लेझरद्वारे कोरलेला असतो.

• एकदा तुटली की पुन्हा वापरता येत नाही.

• बनावट तयार करणे अशक्य, चोरी व गैरवापर रोखते.

• अपघातातही वाहनमालकाची माहिती सहज मिळते.

एप्रिल २०१९ नंतरच्या सर्व वाहनांना ती आधीपासूनच अनिवार्य असून, आता २०१९ पूर्वीच्या वाहनांसाठीही ती बंधनकारक करण्यात आली आहे.