🕯️ निर्जन रस्ता, अर्धवट जळालेला मृतदेह आणि १३ वर्षांच्या मुलाच्या हत्येमागील थरारक गुंता!

कर्नाटकची राजधानी बंगळुरूमधील एक धक्कादायक घटना समोर आली आहे. निर्जन रस्त्यावर अंधारात सापडलेला अर्धवट जळालेला मृतदेह आणि त्यामागचा रहस्यमय गुंता सध्या संपूर्ण शहरात चर्चेचा विषय ठरत आहे. या मृतदेहाची ओळख पटवली गेल्यानंतर अनेकांना धक्का बसला, कारण हा मृतदेह होता अवघ्या १३ वर्षांच्या निष्पाप मुलाचा!

शांतिनिकेतन ब्लॉकमध्ये राहणारा निश्चित ए, हा आठवीत शिकणारा विद्यार्थी नेहमीप्रमाणे ३० जुलैच्या संध्याकाळी पाच वाजता ट्यूशनसाठी घरातून बाहेर पडला होता. मात्र रात्री उशिरापर्यंत तो घरी न परतल्याने घरच्यांची चिंता वाढली. ट्यूशन टीचरने सांगितले की निश्चित वेळेवर निघून गेला होता. त्यामुळे परिस्थिती अधिकच संशयास्पद बनली. घरच्यांनी तत्काळ पोलिसांकडे धाव घेतली.

तपास सुरू असतानाच, फॅमिली पार्कजवळ एका निर्जन रस्त्यावर एक अर्धवट जळालेला मृतदेह आढळून आला. तपास अधिक खोलात गेल्यावर पोलिसांना सीसीटीव्ही फुटेजमध्ये निश्चित एका दुचाकीस्वारासोबत जाताना दिसला. कोण होता हा दुचाकीस्वार?

दरम्यान, रात्री १ वाजता एक अज्ञात कॉल निश्चितच्या घरच्यांना आला. फोन करणाऱ्याने खंडणीसाठी ५ लाखांची मागणी केली. दुसऱ्या दिवशी अपहरणकर्त्यांनी घरच्यांना शहरात इथून तिथे भटकवत ठेवले, मात्र अचानक त्यांचा फोन बंद झाला.

३१ जुलै रोजी संध्याकाळी साडेपाचच्या सुमारास पोलिसांना निश्चितचा मृतदेह सापडला. त्याचे शरीर अर्धवट जळालेले होते. घटनेनं सगळ्यांनाच सुन्न केलं.

गुरुवारी रात्री पोलिसांना गुप्त माहिती मिळाली की कगलीपुरा परिसरात काही संशयित लपले आहेत. पोलिसांनी कारवाई करत काही आरोपींना शरण येण्यास सांगितले, मात्र त्यांनी प्रतिकार केला. चकमकीत दोन आरोपी जखमी झाले व इतर दोघांना पकडण्यात आले.

चौकशीत गुरुमूर्ती आणि गोपीकृष्ण अशी आरोपींची नावे उघड झाली. यातील गुरुमूर्ती हा पूर्वी निश्चितच्या घरी चालक म्हणून काम करत होता. त्याने मुलाच्या आईशी APP वरून ओळख वाढवली होती आणि घरी नेहमी यायचा. त्यामुळे घरच्या सवयी, वेळा आणि सर्व माहिती त्याला ठाऊक होती.

घटनेच्या दिवशी त्याने पाणीपुरी खायला नेतो असं सांगून निश्चितला फसवून नेलं आणि अपहरण करत खंडणी मागितली. परंतु पोलिस तपासात आता हे समोर येत आहे की, या घटनेमागे फक्त खंडणीचा उद्देश होता की आणखी काही, हे शोधणे बाकी आहे.

ही घटना अपहरण, खंडणी, आणि विश्वासघाताचं भयावह मिश्रण असून, एक निष्पाप जीव, ज्या व्यक्तीवर विश्वास ठेवला, त्याच्याकडून धोका झाल्याचं दुर्दैवी उदाहरण आहे. पोलिसांकडून पुढील तपास वेगाने सुरू आहे.