🌊खडकवासला धरणातून ४४ दिवसांत १२.६२ टीएमसी पाण्याचा विसर्ग; पुण्याच्या पिण्याच्या पाण्यासाठी साडेआठ महिने पुरेसे

खडकवासला (मानस मते) : १९ जूनपासून ते १ ऑगस्टपर्यंतच्या ४४ दिवसांच्या कालावधीत खडकवासला धरणातून मुठा नदीत सुमारे १२.६२ टीएमसी पाणी सोडण्यात आले आहे. हे प्रमाण म्हणजे वरसगाव धरण एकदा पूर्ण भरल्यावर सोडल्यास जेवढं पाणी मिळतं, किंवा खडकवासला धरण तब्बल सहा वेळा भरून सोडल्यास तेवढ्या प्रमाणात पाण्याचा विसर्ग झाला आहे.

खडकवासला धरण साखळीतील सर्वाधिक क्षमतेचं धरण म्हणजे वरसगाव, ज्याची एकूण पाणी साठवण क्षमता १२.८२ टीएमसी आहे. त्यानंतर पानशेत धरणाची क्षमता १०.६५ टीएमसी इतकी आहे. त्यामुळे आतापर्यंत झालेला विसर्ग पूर्ण वरसगाव किंवा पानशेतच्या पाणीसाठ्याइतका आहे.

सध्या पुणे शहराला दररोज १४५० एमएलडी (१४ कोटी ५० लाख लिटर) पाणीपुरवठा केला जातो. या दराने पाहिल्यास, १२.६२ टीएमसी पाणी सुमारे साडेआठ महिने पुणेकरांच्या पिण्याच्या गरजेसाठी पुरेसे ठरले असते.

जरी काही नागरिकांनी मुठा नदीपात्रात सोडलेलं पाणी वाया जातं अशी शंका व्यक्त केली असली, तरी हे पाणी भीमा नदीमार्गे उजनी धरणात पोहोचते. उजनीत साठवलेलं हे पाणी सोलापूर जिल्ह्यासाठी महत्त्वाचं ठरतं, त्यामुळे हा पाण्याचा विसर्ग वाया जात नसल्याचं स्पष्ट होतं.

पावसाचा लपंडाव सुरूच; हलक्या पावसाची शक्यता

गेल्या काही दिवसांपासून पुण्यात पावसाचा लपंडाव सुरू आहे. शनिवारी (२ ऑगस्ट) दिवसभर कधी पाऊस, तर कधी ऊन अशा बदलत्या हवामानाचं चित्र पाहायला मिळालं. या दरम्यान, कमाल तापमानातही लक्षणीय वाढ नोंदवली गेली.

भारतीय हवामान विभागाच्या अंदाजानुसार, पुढील २ ते ३ दिवसांत शहरात हलक्या स्वरूपाचा पाऊस पडण्याची शक्यता वर्तवण्यात आली आहे.