प्रतिनिधी – मानस : शहरातील एरोड्रोम परिसरात ७५ वर्षीय निवृत्त कर्मचाऱ्याचा मृत्यू झाल्याची धक्कादायक घटना समोर आली आहे. या प्रकरणी त्यांच्या २० वर्षीय नातीला पोलिसांनी ताब्यात घेतले असून, तिच्यावर आजोबांच्या हत्येचा आरोप आहे. आजोबांकडून लहानपणापासून अयोग्य वर्तन होत असल्याच्या आरोपातून हा प्रकार घडल्याचे प्राथमिक चौकशीत समोर आल्याचे पोलिसांनी सांगितले.
मिळालेल्या माहितीनुसार, रविवारी (४ ऑक्टोबर) पहाटेच्या सुमारास संबंधित तरुणीचा तिच्या पालकांशी वाद झाला. त्यानंतर ती दुचाकीवरून एरोड्रोम परिसरातील आजी-आजोबांच्या घरी गेली. घराचा दरवाजा उघडल्यानंतर तिचा आजोबांसोबत वाद झाला. यावेळी क्रिकेट बॅटने आजोबांच्या डोक्यावर प्रहार केल्याचा आरोप आहे.
घटनेनंतर कुटुंबीयांनी त्यांना तातडीने रुग्णालयात नेले. मात्र, वैद्यकीय तपासणीत डॉक्टरांनी त्यांना मृत घोषित केले. मृत व्यक्ती राज्य सशस्त्र दलातील निवृत्त कर्मचारी होते आणि ते पत्नीसमवेत राहत होते. तर त्यांची नात तिच्या आई-वडिलांसोबत महालक्ष्मी नगर परिसरात राहत होती.
घटनेची माहिती मिळताच पोलिसांनी तरुणीला ताब्यात घेतले. चौकशीदरम्यान आजोबांकडून आपल्यासोबत अनेकदा अयोग्य वर्तन झाल्याचा आरोप तिने केल्याचे पोलिसांनी सांगितले. मात्र, या आरोपांची स्वतंत्रपणे पडताळणी होणे बाकी आहे.
पोलिसांनी मृतदेह शवविच्छेदनासाठी पाठविला असून, घटनेपूर्वी नेमका काय प्रकार घडला, हत्येचे कारण काय होते आणि तरुणीने केलेले आरोप कितपत सत्य आहेत, याचा तपास सुरू आहे. पोलिसांकडून तरुणीची अधिक चौकशी करण्यात येत आहे.
