पुणे जिल्ह्यातील नगरपरिषदांच्या निवडणुकीत मोठा बदल; बारामतीसह ‘या’ ठिकाणचे मतदान आता २० डिसेंबरला
पुणे: राज्य निवडणूक आयोगाच्या निर्देशानुसार पुणे जिल्ह्यातील काही महत्त्वाच्या नगरपरिषदांच्या निवडणूक कार्यक्रमात बदल करण्यात आला आहे. न्यायालयातील अपीलांचे निकाल उशिरा लागल्यामुळे बारामती आणि फुरसुंगी उरुळी देवाची या नगरपरिषदांच्या संपूर्ण निवडणुका, तर इतर काही ठिकाणच्या ठराविक जागांच्या निवडणुका स्थगित करण्यात आल्या आहेत. आता या सर्व जागांसाठी २० डिसेंबर २०२५ रोजी मतदान होणार असल्याची माहिती जिल्हाधिकारी जितेंद्र डूडी यांनी दिली आहे.
निवडणूक पुढे ढकलण्यामागचे कारण: राज्य निवडणूक आयोगाच्या २९ नोव्हेंबर २०२५ च्या पत्रानुसार, नगरपरिषदा व नगरपंचायतीच्या ज्या जागांसाठी किंवा अध्यक्षपदासाठी जिल्हा न्यायालयात अपील दाखल होते आणि त्याचा निकाल २२ नोव्हेंबर २०२५ नंतर (म्हणजेच २३ नोव्हेंबर किंवा त्यानंतर) लागला आहे, अशा ठिकाणच्या निवडणुका पूर्वीच्या कार्यक्रमाप्रमाणे (४ नोव्हेंबरच्या आदेशानुसार) घेतल्या जाऊ नयेत, असे स्पष्ट करण्यात आले आहे.
बारामती आणि फुरसुंगी उरुळी देवाची: संपूर्ण निवडणूक स्थगित बारामती आणि फुरसुंगी उरुळी देवाची नगरपरिषदेच्या अध्यक्षपदासंदर्भात जिल्हा न्यायालयात अपील दाखल करण्यात आले होते. या अपीलाचा निकाल २२ नोव्हेंबरपूर्वी लागणे अपेक्षित होते, परंतु तो २६ नोव्हेंबर २०२५ रोजी लागला. आयोगाच्या नियमानुसार, जर अशा प्रकरणात अध्यक्षपदाचा समावेश असेल, तर त्या संपूर्ण नगरपरिषदेची निवडणूक स्थगित करून सुधारीत वेळापत्रकानुसार घ्यावी लागते. त्यामुळे, या दोन्ही नगरपरिषदांच्या अध्यक्षपदासाठी आणि सदस्यपदांसाठीची सार्वत्रिक निवडणूक आता २० डिसेंबर २०२५ रोजी होईल.
इतर नगरपरिषदांमधील स्थगित झालेल्या विशिष्ट जागा: तळेगाव दाभाडे, लोणावळा, दौंड आणि सासवड नगरपरिषदेच्या काही सदस्य पदांसंदर्भातही न्यायालयात अपील होते आणि त्यांचे निकाल २२ नोव्हेंबरनंतर आले आहेत. त्यामुळे खालील विशिष्ट जागांसाठीचे मतदान देखील २० डिसेंबर २०२५ रोजी घेतले जाईल:
- बारामती नगरपरिषद: जागा क्र. २ (अ), ८ (ब), ११ (ब), १३ (ब), १५ (ब), १७ (अ) व १९ (ब).
- फुरसुंगी उरुळी देवाची नगरपरिषद: जागा क्र. १३ (ब).
- तळेगाव दाभाडे नगरपरिषद: जागा क्र. २ (अ), ७ (अ), ७ (ब), ८ (अ), ८ (ब) व १० (ब).
- लोणावळा नगरपरिषद: जागा क्र. ५ (ब) व १० (अ).
- दौंड नगरपरिषद: जागा क्र. ९ (अ).
- सासवड नगरपरिषद: जागा क्र. ११ (अ).
उमेदवारांसाठी महत्त्वाच्या सूचना:
- नव्याने अर्ज नाही: या सुधारीत कार्यक्रमांतर्गत अध्यक्ष व सदस्य पदासाठी कोणत्याही उमेदवारास नव्याने नामनिर्देशन पत्र (Form) दाखल करता येणार नाही.
- अर्ज माघार घेणे: ज्या उमेदवारांना आपले नामनिर्देशनपत्र मागे घ्यावयाचे आहे, त्यांच्यासाठी अंतिम मुदत १० डिसेंबर २०२५ रोजी दुपारी ०३:०० वाजेपर्यंत असेल.
राज्य निवडणूक आयोगाच्या सुधारीत वेळापत्रकानुसार या निवडणुकांचा सविस्तर कार्यक्रम स्वतंत्रपणे वृत्तपत्रात प्रसिद्ध केला जाईल, असे जिल्हा प्रशासनाने स्पष्ट केले आहे.
