पुणे, २२ मे २०२६ : पुणे मेट्रो प्रवाशांसाठी मोठा दिलासा देणारी डिजिटल सुविधा सुरू झाली आहे. आता प्रवाशांना थेट ‘उबर’ ॲपवरून पुणे मेट्रोचे क्युआर तिकीट बुक करता येणार आहे. ‘ओपन नेटवर्क फॉर डिजिटल कॉमर्स’ (ओएनडीसी)च्या माध्यमातून ही सेवा उपलब्ध करण्यात आली असून, तिकिटासाठी रांगेत उभे राहण्याची गरज आता कमी होणार आहे.
दिल्ली, मुंबई, बंगळुरू आणि चेन्नईनंतर ही सुविधा सुरू करणारे पुणे हे देशातील पाचवे शहर ठरले आहे. सुरुवातीच्या ऑफरअंतर्गत उबरकडून मेट्रो तिकिटांवर ५० टक्क्यांपर्यंत सूट (कमाल १० रुपये) देण्यात येत आहे.
प्रवाशांना काय मिळणार फायदा?
- उबर ॲपवरून थेट मेट्रो तिकीट बुकिंग
- क्युआर कोड आधारित डिजिटल तिकीट
- ‘यूपीआय’द्वारे ऑनलाइन पेमेंट सुविधा
- मेट्रो स्थानकानंतर ‘लास्ट-माइल’ प्रवासासाठी ऑटो, बाईक आणि कार बुकिंगची सुविधा
- वेळेची बचत आणि अधिक सुलभ प्रवास अनुभव
अधिकाऱ्यांची प्रतिक्रिया
उबरच्या भारत आणि दक्षिण आशियातील स्ट्रॅटेजिक इनिशिएटिव्ह्ज प्रमुख नेहा कपूर यांनी सांगितले की, सार्वजनिक वाहतूक आणि लास्ट-माइल सेवा एकाच प्लॅटफॉर्मवर आल्याने पुणेकरांचा प्रवास अधिक सोपा होणार आहे.
तर महाराष्ट्र मेट्रो रेल कॉर्पोरेशनचे व्यवस्थापकीय संचालक श्रवण हर्डीकर यांनी सांगितले की, या सुविधेमुळे सार्वजनिक वाहतुकीचा वापर वाढण्यास मदत होईल.
ओएनडीसीचे व्यवस्थापकीय संचालक विभोर जैन यांनीही या उपक्रमाचे स्वागत करत, पुणे मेट्रो ‘राष्ट्रीय डिजिटल ट्रान्झिट नेटवर्क’शी जोडल्याने प्रवाशांचा अनुभव अधिक अखंड होईल, असे नमूद केले.
उबर ॲपवरून मेट्रो तिकीट कसे बुक कराल?
- मोबाईलमध्ये ‘उबर’ ॲप उघडा
- होम स्क्रीनवरील ‘मेट्रो’ पर्याय निवडा
- प्रवासाचे सुरुवातीचे आणि अंतिम स्थानक निवडा
- ‘यूपीआय’द्वारे पेमेंट करा
- मिळालेला क्युआर कोड स्टेशनवर स्कॅन करून प्रवास करा
पुण्यात वाढत्या शहरीकरणाच्या पार्श्वभूमीवर ही सुविधा स्मार्ट आणि एकात्मिक सार्वजनिक वाहतुकीच्या दिशेने महत्त्वाचे पाऊल मानले जात आहे.
