मुंबई–कोकण प्रवाशांसाठी मध्य रेल्वेकडून मोठी दिलासादायक बातमी समोर आली आहे. दीर्घकाळ प्रलंबित असलेली दिवा–चिपळूण मेमू लोकल सेवा आता कायमस्वरूपी सुरू करण्यात आली आहे. या सेवेच्या वेळापत्रकात काही आवश्यक सुधारणा करण्यात आल्या असून, ही लोकल पश्चिम कोस्टल रेल्वे मार्गावरील तब्बल २६ स्थानकांवर थांबणार आहे.
प्रवाशांची ही मागणी अनेक वर्षांपासून प्रलंबित होती. कोकण रेल्वे प्रवासी संघटना आणि स्थानिक नागरिक सतत या सेवेच्या मागणीसाठी प्रयत्नशील होते. अखेर मध्य रेल्वे प्रशासनाने प्रवाशांचा आवाज ऐकला असून, ही सेवा १५ ऑगस्टपासून कायमस्वरूपी सुरू करण्याचा निर्णय घेतला आहे.
गणेशोत्सवाच्या काळात २० ऑगस्टपासून तात्पुरती सुरू करण्यात आलेली ही सेवा प्रवाशांचा उत्तम प्रतिसाद मिळाल्यानंतर आता कायमस्वरूपी सुरू करण्यात आली आहे. दिवा–चिपळूण आणि चिपळूण–दिवा या दोन्ही मार्गांसाठी प्रत्येकी एक अशी दोन मेमू लोकल गाड्या उपलब्ध असतील.
नवीन वेळापत्रकानुसार :
-
दिवा स्थानकातून सकाळी ७:१५ वाजता चिपळूणसाठी मेमू लोकल सुटेल.
-
चिपळूण स्थानकातून दुपारी १२:०० वाजता दिव्यासाठी परतीची मेमू लोकल धाव घेईल.
ही लोकल सेवा पनवेल, पेण, रोहा आणि माणगाव या चार मुख्य जंक्शनवर क्रॉसिंगसाठी थांबा घेणार आहे. संपूर्ण प्रवासाचा कालावधी केवळ ६ तास ४५ मिनिटे इतका असेल.
कोलाड, इंदापूर, माणगाव, गोरेगाव, वीर आदी स्थानकांहून नियमित प्रवास करणाऱ्या प्रवाशांसाठी ही सेवा अत्यंत सोयीस्कर ठरणार आहे. या सेवेच्या माध्यमातून कोकण आणि मुंबई यांतील रेल्वे संपर्क आणखी मजबूत होणार असल्याचे दिवा रेल्वे प्रवासी संघटनेने नमूद केले आहे.
