IMD Weather Update: ऑगस्टमध्ये देशावर पावसाचं संकट; महाराष्ट्राच्या चिंतेत वाढ
पुणे : देशात यंदा मान्सून वेळेपूर्वी दाखल झाला आणि अनेक भागांत जोरदार पावसाने हजेरी लावली असली, तरी पावसाचे प्रमाण असमान राहिल्याने काही भागांत पूरस्थिती तर काही ठिकाणी पावसाच्या प्रतिक्षेची स्थिती निर्माण झाली आहे. विशेषतः महाराष्ट्रातील कोकण आणि विदर्भात मुसळधार पाऊस झाला असला, तरी मराठवाड्यासारख्या भागांमध्ये अजूनही समाधानकारक पावसाची प्रतीक्षा आहे. अशातच हवामान विभागाच्या (IMD) नव्या अंदाजामुळे राज्याच्या चिंतेत भर पडली आहे.
हवामान विभागाने सांगितले आहे की मान्सूनच्या दुसऱ्या टप्प्यात – म्हणजे ऑगस्ट आणि सप्टेंबर महिन्यांत – देशात सरासरीपेक्षा अधिक पावसाची शक्यता आहे. भारतीय हवामान विभागाचे प्रमुख मृत्युंजय महापात्र यांनी सांगितले की पुढील दोन महिन्यांत अनेक भागांत अतिवृष्टी होऊ शकते. मात्र, यासोबतच त्यांनी स्पष्ट केलं की पूर्वोत्तर भारत, त्याला लागून असलेली राज्यं आणि मध्य भारतात काही ठिकाणी कमी पावसाची शक्यता आहे.
मध्य भारतात कमी पावसाचा अंदाज वर्तवला गेल्याने महाराष्ट्रातील मराठवाडा, विदर्भातील काही भाग, आणि काही पश्चिम महाराष्ट्राचे पट्टे यांच्यासाठी हा अंदाज चिंतेचा विषय ठरत आहे. या भागांमध्ये आधीच पावसाचं प्रमाण कमी असून, पुढील काळात पावसाचा जोर ओसरणार असल्याचा इशारा शेतकऱ्यांसाठी अडचणी निर्माण करणारा ठरू शकतो.
१ जून ते ३१ जुलै या कालावधीत देशात सरासरी ४७४.३ मिमी पावसाची नोंद झाली आहे, जे ४४५.८ मिमीच्या सरासरीहून ६% अधिक आहे. म्हणजेच, पावसाचा एकूण आकडा समाधानकारक असला तरी वितरणात मोठी असमानता दिसून येते.
हिमाचल प्रदेश सारख्या राज्यांमध्ये अतिवृष्टीमुळे मोठ्या प्रमाणावर हानी झाली आहे. काही राज्यांत पूरस्थिती निर्माण झाली असून, दुसरीकडे काही भाग अजूनही योग्य पावसाच्या प्रतिक्षेत आहेत.
हवामान विभागाच्या प्राथमिक अंदाजानुसार पुढील दोन आठवडे देशभरात आणि महाराष्ट्रात पावसाचा जोर ओसरण्याची शक्यता आहे. ही स्थिती दोन आठवड्यांपर्यंत किंवा त्याहून थोडी अधिक राहू शकते. त्यानंतर मान्सून पुन्हा सक्रिय होण्याची शक्यता वर्तवण्यात आली आहे.
महाराष्ट्रातील अनेक भागांत अजूनही समाधानकारक पाऊस न झाल्याने शेतकऱ्यांची चिंता वाढली आहे. आता जर पावसाचा जोर ओसरला, तर खरीप हंगामातील पेरणी, पीक उगम आणि उत्पादन यावर मोठा परिणाम होण्याची शक्यता आहे.
