हिंदु जनजागृती समितीची खडकवासला जलाशय रक्षण मोहीम ! एक सामाजिक उपक्रमाचे यंदा 23 वे वर्ष – श्री.पराग गोखले, हिंदु जनजागृती समिती
उपजिल्हाधिकारी, पोलीस प्रशासन तसेच खडकवासला पाटबंधारे विभागाचे मोहिमेस सहकार्याचे आश्वासन !
पुणे – धूलिवंदन आणि रंगपंचमी या दिवशी रंग खेळून खडकवासला जलाशयात आंघोळीसाठी येणे हा प्रकार पर्यावरणाला हानीकारक आहे. संपूर्ण पुणे शहराला पाणीपुरवठा करणारा जलस्रोत प्रदूषित होऊ नये, याचे भान रंग खेळणाऱ्यांनी लक्षात ठेवणे आवश्यक आहे. भारतीय संस्कृतीप्रमाणे आनंदाने सण साजरे करतांना सर्वांनी सण-उत्सवांमध्ये शिरलेल्या अपप्रकारांना थांबवणेही आवश्यक आहे. यासाठी पुणे येथे गेली 22 वर्षे सातत्याने आणि यशस्वपीपणे चालू असलेले ‘खडकवासला जलाशय रक्षण अभियान’ यंदाच्या वर्षीही सर्वांच्या सहभागाने राबवण्यात येणार आहे, असे श्री.पराग गोखले यांनी सांगितले.
खडकवासला जलाशय रक्षण अभियानाचे यंदाचे हे 23 वे वर्ष असून 14 मार्च (धूलिवंदन) आणि 19 मार्च (रंगपंचमी) या दोन्ही दिवशी सकाळी 9.00 ते सायंकाळी 7.00 पर्यंत खडकवासला जलाशयाच्या भोवती मानवी साखळी करून हातात प्रबोधनात्मक फलक घेऊन जलाशयाचे रक्षण करण्यासाठी प्रबोधन करणार आहेत. हिंदु जनजागृती समितीने आरंभ केलेला हा उपक्रम अन्य समविचारी संघटना, खडकवासला ग्रामस्थ, स्थानिक प्रशासन, पाटबंधारे खाते आणि पोलीस प्रशासन यांच्या सहकार्याने 100 टक्के यशस्वीपणे पार पडत आहे.
या संदर्भात 5 आणि 6 मार्च रोजी हिंदु जनजागृती समिती आणि हिंदुत्वनिष्ठ यांच्या वतीने पुणे येथे खडकवासला पाटबंधारे विभाग, जिल्हाधिकारी, पोलीस प्रशासन यांना निवेदन देण्यात आले. या वेळी खडकवासला जलाशय रक्षण मोहीमेच्या 22 वर्षांच्या यशस्वीतेविषयी समितीच्या कार्यकर्त्यांनी निवासी उपजिल्हाधिकारी ज्योती कदम यांना माहिती दिली. पोलीस अधीक्षक पुणे ग्रामीण, मा.सहा.आयुक्त पुणे मनपा क्षेत्रीय कार्यालय सिंहगड रस्ता,पोलीस निरीक्षक नांदेड सिटी, पुणे शहर यांना प्रत्यक्ष भेटून निवेदन दिले. या अभियानात निश्चित सहकार्य करू असे त्यांनी सांगितले.
या अभियानात अधिकाधिक नागरिकांनी सहभागी होण्यासाठी, तसेच अन्य माहितीसाठी (89833 35517) या क्रमांकावर संपर्क करण्याचे आवाहन श्री.पराग गोखले यांनी केले आहे.
