पुणे । प्रतिक गंगणे
महाराष्ट्र पोलीस दलामध्ये दीर्घकालीन, निष्कलंक आणि उल्लेखनीय सेवा बजावणाऱ्या अधिकारी व कर्मचाऱ्यांच्या कार्याची दखल घेऊन त्यांचा गौरव करण्यात येतो. भारतीय स्वातंत्र्य दिनानिमित्त १५ ऑगस्ट २०२६ रोजी येरवडा पोलीस ठाण्याचे वरिष्ठ पोलीस निरीक्षक उमेश गित्ते यांना महाराष्ट्र पोलीस दलातील उल्लेखनीय, गुणवत्तापूर्ण आणि उत्कृष्ट सेवेबद्दल ‘उत्कृष्ट सेवा पदक’ जाहीर करण्यात आले आहे.
वरिष्ठ पोलीस निरीक्षक उमेश गित्ते यांनी आपल्या पोलीस सेवाकाळात कर्तव्यनिष्ठा, शिस्त, प्रामाणिकपणा आणि कार्यक्षमतेला प्राधान्य देत विविध जबाबदाऱ्या प्रभावीपणे पार पाडल्या आहेत. कायदा व सुव्यवस्था राखण्याबरोबरच नागरिकांच्या सुरक्षिततेला सर्वोच्च प्राधान्य देत त्यांनी केलेल्या कामाची दखल घेण्यात आली आहे.
पोलीस अधिकारी म्हणून कर्तव्य बजावताना गुन्हेगारीवर नियंत्रण, नागरिकांशी समन्वय, संवेदनशील प्रकरणांमध्ये तत्पर कार्यवाही तसेच पोलीस दलाची प्रतिमा अधिक सक्षम करण्यासाठी त्यांनी केलेले प्रयत्न उल्लेखनीय ठरले आहेत. त्यांच्या दीर्घकालीन आणि निष्कलंक सेवेला मिळालेला हा सन्मान त्यांच्या कार्याचा गौरव मानला जात आहे.
‘उत्कृष्ट सेवा पदक’ हा सन्मान केवळ एका अधिकाऱ्याच्या कामगिरीचा गौरव नसून, कर्तव्य बजावताना प्रामाणिकपणा, निष्ठा आणि सेवाभाव जपणाऱ्या पोलीस अधिकारी-कर्मचाऱ्यांसाठी प्रेरणादायी ठरणारा आहे. उमेश गित्ते यांच्या या सन्मानामुळे येरवडा पोलीस ठाण्यासह पुणे पोलीस दलातही आनंदाचे वातावरण निर्माण झाले आहे.
