पुणे, १९ मे २०२६ : अमेझॉन कंपनीने भारतीय बाजारपेठेत नवी ‘फायर टीव्ही स्टिक एचडी’ सादर करत घरगुती मनोरंजन क्षेत्रातील स्पर्धेला नवे वळण दिले आहे. आधीच्या आवृत्तीच्या तुलनेत ही नवी साधनसामग्री सुमारे ३० टक्के अधिक वेगाने कार्य करत असल्याचा दावा कंपनीने केला आहे. अधिक जलद, अखंड आणि सुलभ चित्रप्रवाहाचा अनुभव देण्यावर कंपनीचा भर असल्याचे सांगण्यात आले.
पूर्ण एचडी दर्जातील चित्रप्रवाह, अधिक स्थिर बिनतारी जाळे जोडणी, जलद प्रतिसाद क्षमता आणि नव्या स्वरूपातील वापर प्रणाली ही या उत्पादनाची प्रमुख वैशिष्ट्ये आहेत. कंपनीच्या माहितीनुसार, ही आतापर्यंतची सर्वात सडपातळ आणि हलकी ‘फायर टीव्ही स्टिक’ असून ती थेट दूरचित्रवाणी संचाच्या ‘यूएसबी’ जोडणीवर चालवता येते. त्यामुळे स्वतंत्र विद्युत जोडणी किंवा अतिरिक्त तारा वापरण्याची आवश्यकता राहत नाही.
आकाराने लहान असल्याने ही साधनसामग्री प्रवासादरम्यान सहज बरोबर नेता येणार आहे. त्यामुळे ग्राहकांना कुठेही त्यांच्या आवडत्या मालिका, चित्रपट किंवा थेट कार्यक्रमांचा आनंद घेता येईल.
नव्या प्रणालीमध्ये चित्रपट, मालिका, थेट कार्यक्रम आणि विनामूल्य सामग्रीसाठी स्वतंत्र विभाग देण्यात आले आहेत. त्यामुळे ग्राहकांना अपेक्षित मनोरंजन कमी वेळेत शोधणे अधिक सोपे होणार आहे. याशिवाय घरातील वातानुकूलन यंत्रणा, पंखे, दिवे आणि इतर स्मार्ट उपकरणांचे नियंत्रणही या प्रणालीद्वारे करता येणार आहे. आवाजाद्वारे आदेश देण्याची सुविधाही उपलब्ध करून देण्यात आली असून त्यामुळे कार्यक्रम शोधणे आणि सुरू करणे अधिक सुलभ होणार आहे.
कंपनीने यंदाच्या सुरुवातीला भारतात ‘फायर टीव्ही’साठी नव्या स्वरूपातील भ्रमणध्वनी अनुप्रयोगही सादर केला होता. या सुविधेमुळे ग्राहकांना भ्रमणध्वनीवरूनच कार्यक्रम शोधणे, पाहण्याची यादी तयार करणे आणि दूरचित्रवाणीवर थेट कार्यक्रम सुरू करणे शक्य झाले आहे.
मनोरंजनासोबतच खेळप्रेमींनाही लक्षात घेऊन या साधनामध्ये मेघाधारित खेळांचा पर्याय उपलब्ध करून देण्यात आला आहे. त्यामुळे स्वतंत्र खेळयंत्रांशिवाय विविध खेळांचा अनुभव घेता येणार आहे.
‘फायर टीव्ही’ विभागाच्या प्रमुख सयंतनी चौधरी म्हणाल्या, “ग्राहकांना अधिक वेगवान आणि प्रतिसादक्षम मनोरंजन अनुभव अपेक्षित असतो. चित्रफिती जलद सुरू होणे, कार्यक्रम सहज शोधता येणे आणि अडथळामुक्त चित्रप्रवाह मिळणे या गरजा लक्षात घेऊन आम्ही नवी ‘फायर टीव्ही स्टिक एचडी’ विकसित केली आहे. कार्यक्षमता, रचना आणि वापरातील सुलभता यांचा समतोल साधत भारतीय ग्राहकांसाठी हे उत्पादन सादर करताना आम्हाला आनंद होत आहे.”
नवी ‘फायर टीव्ही स्टिक एचडी’ ४ हजार ९९९ रुपयांत उपलब्ध करण्यात आली असून ग्राहकांना ती अमेझॉनसह विविध ऑनलाइन खरेदी आणि त्वरित वितरण मंचांवरून खरेदी करता येणार आहे. कंपनीने लवकरच हे उत्पादन किरकोळ विक्री केंद्रांमध्येही उपलब्ध होणार असल्याचे स्पष्ट केले आहे.
