भगवान श्रीकृष्णांच्या जीवनावर आधारित कृष्णावतारम् या चित्रपटाने सध्या देशासह जगभरात अभूतपूर्व लोकप्रियता मिळवली आहे. भव्य दृश्यरचना, प्रभावी कथानक आणि भक्तीभावाने परिपूर्ण सादरीकरणामुळे हा चित्रपट प्रेक्षकांच्या मनावर अधिराज्य गाजवत असून बॉक्स ऑफिसवरही विक्रमी कमाई करत आहे. भारतातील एकूण ग्रॉस कमाई ₹२४.८१ कोटींवर पोहोचली असून एकूण नेट कलेक्शन ₹२०.९६ कोटी इतके झाले आहे.
गेल्या काही दिवसांत चित्रपटाच्या कमाईत मोठी वाढ झाली असून अनेक ठिकाणी हाऊसफुल्ल शो सुरू आहेत. विशेष म्हणजे हा चित्रपट केवळ मनोरंजनापुरता मर्यादित न राहता प्रेक्षकांना एक आध्यात्मिक अनुभूती देत आहे. थिएटरमध्ये श्रीकृष्णांच्या भजनांचा गजर, भावनिक प्रसंगांदरम्यान प्रेक्षकांचे अश्रू आणि आनंदोत्सवाचे वातावरण पाहायला मिळत आहे.
हिंदीसोबतच तेलुगू आणि तमिळ भाषांतील आवृत्त्यांनाही प्रचंड प्रतिसाद मिळत असून भारताबाहेरील कॅनडा, दुबई, फ्रान्ससारख्या देशांमध्येही चित्रपटाची मोठी चर्चा सुरू आहे. सोशल मीडियावर चित्रपटाविषयीचे व्हिडिओ, प्रतिक्रिया आणि भक्तीमय वातावरण मोठ्या प्रमाणात व्हायरल होत आहेत.
अनेक आध्यात्मिक गुरूंनी आणि सांस्कृतिक क्षेत्रातील मान्यवरांनी चित्रपटाचे कौतुक केले असून हा चित्रपट भारतीय संस्कृती, श्रद्धा आणि कुटुंबव्यवस्थेला नव्या पिढीसमोर प्रभावीपणे मांडत असल्याचे मत व्यक्त केले जात आहे. कृष्णावतारम् आता केवळ एक चित्रपट नसून भक्ती, भावना आणि संस्कृतीचा जागतिक उत्सव बनला आहे.
