NEET-UG 2026 पेपरफुटी प्रकरणात केंद्रीय अन्वेषण विभागाने (CBI) मोठी कारवाई करत पुण्यातील बायोलॉजी व्याख्याता मनीषा गुरुनाथ मांढरेला अटक केली आहे. या प्रकरणातील नववी आरोपी असलेल्या मांढरेला राऊस ॲव्हेन्यू न्यायालयात हजर करण्यात आले असता न्यायालयाने तिला 14 दिवसांची CBI कोठडी सुनावली.
CBI च्या तपासानुसार, मनीषा मांढरे ही नॅशनल टेस्टिंग एजन्सी (NTA) च्या पेपर सेटिंग कमिटीशी संबंधित होती. त्यामुळे तिला परीक्षेत येणाऱ्या प्रश्नांची पूर्वकल्पना होती, असा संशय तपास यंत्रणेला आहे. दिल्लीतील CBI मुख्यालयात दीर्घ चौकशीनंतर तिला अटक करण्यात आली.
विद्यार्थ्यांना आधीच प्रश्न शिकवल्याचा आरोप
तपासात असे समोर आले आहे की, मनीषा मांढरेने पुण्यात विशेष कोचिंग क्लास चालवत विद्यार्थ्यांना बॉटनी आणि झूलॉजी विषयातील संभाव्य प्रश्न व उत्तरे शिकवली होती. हेच प्रश्न नंतर प्रत्यक्ष NEET परीक्षेत आल्याचा दावा CBI ने केला आहे.
तसेच, पुण्यातील ब्युटिशियन मनीषा वाघमारेच्या माध्यमातून विद्यार्थ्यांना या खासगी क्लासमध्ये प्रवेश देण्यात येत होता. या नेटवर्कमार्फत पेपरफुटीचे रॅकेट चालत असल्याचा संशय तपास यंत्रणेला आहे.
लाखो रुपयांचा व्यवहार
CBI च्या माहितीनुसार, आरोपींनी पेपर उपलब्ध करून देण्यासाठी विद्यार्थी आणि पालकांकडून लाखो रुपये घेतले. या व्यवहारांबाबत आर्थिक पुरावे आणि डिजिटल माहिती तपासली जात आहे.
मनीषा वाघमारेला यापूर्वीच 14 मे रोजी अटक करण्यात आली होती. तिच्या चौकशीतूनच मनीषा मांढरेचे नाव समोर आले.
पी. व्ही. कुलकर्णीवर मुख्य सूत्रधार असल्याचा संशय
या प्रकरणातील कथित मास्टरमाईंड म्हणून लातूरमधील रसायनशास्त्राचे प्राध्यापक पी. व्ही. कुलकर्णी याचे नाव समोर आले आहे. तो अनेक वर्षांपासून NEET पेपर सेटिंगशी संबंधित पॅनेलमध्ये कार्यरत होता.
CBI च्या तपासानुसार, एप्रिलच्या शेवटच्या आठवड्यात त्याने काही विद्यार्थ्यांसाठी विशेष वर्ग घेतले होते. त्या वर्गांमध्ये विद्यार्थ्यांना प्रश्न, पर्याय आणि उत्तरे सांगण्यात आली होती, जी नंतर परीक्षेत आल्याचा दावा केला जात आहे.
देशभरात CBI ची छापेमारी
या प्रकरणात CBI ने दिल्ली, जयपूर, गुरुग्राम, पुणे, नाशिक, अहिल्यानगर आणि नांदेडसह विविध शहरांमध्ये छापेमारी केली आहे. आतापर्यंत नऊ आरोपींना अटक करण्यात आली असून, आणखी काही संशयितांची चौकशी सुरू आहे.
NTA मध्ये मोठे बदल
पेपरफुटी प्रकरणानंतर केंद्र सरकारने NTA मध्ये मोठे प्रशासकीय बदल केले आहेत. IRS अधिकारी आकाश जैन आणि आदित्य राजेंद्र भोजगढिया यांची संयुक्त संचालक म्हणून नियुक्ती करण्यात आली आहे. तसेच अनुजा बापट आणि रुचिता विज यांची संयुक्त सचिव म्हणून नियुक्ती करण्यात आली आहे.
परीक्षा रद्द; फेरपरीक्षा 21 जूनला
NEET-UG 2026 परीक्षा 3 मे रोजी देशातील 551 शहरांमध्ये आणि परदेशातील 14 केंद्रांवर घेण्यात आली होती. सुमारे 23 लाख विद्यार्थी परीक्षेला बसले होते. गैरव्यवहाराची माहिती समोर आल्यानंतर 12 मे रोजी परीक्षा रद्द करण्यात आली असून, 21 जून रोजी फेरपरीक्षा घेण्यात येणार आहे.
सर्वोच्च न्यायालयात याचिका
दरम्यान, युनायटेड डॉक्टर्स फ्रंट (UDF) ने सर्वोच्च न्यायालयात याचिका दाखल करत NTA बरखास्त करण्याची मागणी केली आहे. राष्ट्रीय स्तरावरील परीक्षा अधिक पारदर्शक आणि सुरक्षित पद्धतीने घेण्यासाठी स्वतंत्र राष्ट्रीय परीक्षा संस्था स्थापन करण्याची मागणीही करण्यात आली आहे.
