Ahilyanagar Crime News : अहिल्यानगर हादरले! माजी महापौर अभिषेक कळमकर यांच्यावर अत्याचाराचा गुन्हा; नोकरीच्या आमिषाने तरुणीचा छळ केल्याचा आरोप

अहिल्यानगर : शहराचे माजी महापौर आणि राष्ट्रवादी काँग्रेस (शरदचंद्र पवार गट) चे शहर जिल्हाध्यक्ष अभिषेक कळमकर यांच्यावर २५ वर्षीय तरुणीवर अत्याचार केल्याचा गंभीर गुन्हा दाखल झाल्याने जिल्ह्यात खळबळ उडाली आहे. या प्रकरणी एमआयडीसी पोलीस ठाण्यात गुन्हा नोंदविण्यात आला असून पोलिसांकडून सखोल तपास सुरू आहे.

नोकरीच्या आमिषाने जाळ्यात ओढल्याचा आरोप

फिर्यादी तरुणीच्या तक्रारीनुसार, शाळेत नोकरी लावून देण्याचे आमिष दाखवत आरोपीने तिच्याशी संपर्क साधला. त्यानंतर अहिल्यानगर शहरात तसेच पुणे जिल्ह्यातील शिरूर येथील एका लॉजवर बोलावून तिच्यावर जबरदस्ती केल्याचा आरोप तक्रारीत करण्यात आला आहे.

तरुणीने दिलेल्या माहितीनुसार, नोकरीची हमी देत आरोपीने विश्वास संपादन केला आणि त्यानंतर शारीरिक संबंधांसाठी दबाव टाकण्यास सुरुवात केली. नकार दिल्यास नोकरीची संधी रद्द करण्याची धमकी दिल्याचेही तिने म्हटले आहे.

व्हिडिओ कॉलद्वारे छळ

तक्रारीत नमूद केल्याप्रमाणे, आरोपी वेळोवेळी मोबाईलवर व्हिडिओ कॉल करून तरुणीला कपडे काढण्यास भाग पाडत असे. तिला मानसिक त्रास देत तासनतास ऑनलाइन राहण्यास भाग पाडल्याचा आरोप आहे. या सततच्या छळामुळे त्रस्त होऊन अखेर तरुणीने पोलिसांकडे धाव घेतली.

व्हिडिओ रेकॉर्डिंग करून ब्लॅकमेल

अत्याचाराच्या वेळी आरोपीने व्हिडिओ रेकॉर्डिंग केल्याचा आरोपही तक्रारीत करण्यात आला आहे. हे व्हिडिओ सोशल मीडियावर व्हायरल करण्याची धमकी देत वारंवार शारीरिक व मानसिक छळ केल्याचे पीडितेने म्हटले आहे.

तरुणीने संबंधित व्हिडिओ स्वरूपातील काही पुरावे पोलिसांकडे सादर केल्याची माहिती सूत्रांनी दिली आहे. त्याआधारे पोलिसांनी गुन्हा नोंदवून पुढील तपासाला सुरुवात केली आहे.

राजकीय वर्तुळात खळबळ

शहराचे माजी महापौर आणि प्रमुख राजकीय पदाधिकारी असलेल्या व्यक्तीवर गंभीर आरोप झाल्याने अहिल्यानगरमध्ये मोठी चर्चा सुरू झाली आहे. राजकीय वर्तुळातही या प्रकरणाची तीव्र प्रतिक्रिया उमटत असून विविध पक्षांकडून निष्पक्ष चौकशीची मागणी होत आहे.

एमआयडीसी पोलिसांकडून प्रकरणाचा तपास सुरू असून, आरोपीची चौकशी आणि पुराव्यांची पडताळणी केली जात आहे. पुढील कायदेशीर कारवाईबाबत पोलिसांकडून लवकरच अधिकृत माहिती दिली जाणार आहे.