Maharashtra Election | मोठी बातमी: जिल्हा परिषद–पंचायत समिती निवडणुकांचे मतदान व निकाल पुढे ढकलले, तारखांमध्ये महत्त्वाचा बदल
मुंबई : राज्यातील 12 जिल्हा परिषदा आणि त्याअंतर्गत 125 पंचायत समित्यांच्या सार्वत्रिक निवडणुकांच्या वेळापत्रकात Maharashtra State Election Commission यांनी बदल जाहीर केला आहे. राज्यात जाहीर करण्यात आलेल्या तीन दिवसांच्या दुखवट्याच्या पार्श्वभूमीवर हा निर्णय घेण्यात आला असून, त्यानुसार 5 फेब्रुवारीला होणारे मतदान आता 7 फेब्रुवारी 2026 रोजी होणार आहे. तसेच मतमोजणीची तारीख 9 फेब्रुवारी 2026 अशी निश्चित करण्यात आली आहे.
राज्य निवडणूक आयोगाने या निवडणुकांसाठी 13 जानेवारी 2026 रोजी सविस्तर निवडणूक कार्यक्रम जाहीर केला होता. त्यानुसार नामनिर्देशनपत्रे दाखल करणे, माघारी, निवडणूक चिन्ह वाटप आणि अंतिम उमेदवारांची यादी प्रसिद्ध करण्याची प्रक्रिया पूर्ण झाली आहे. मात्र मतदान, मतमोजणी आणि निवडून आलेल्या सदस्यांची नावे राजपत्रात प्रसिद्ध करणे हे टप्पे अद्याप शिल्लक होते.
दुखवट्यामुळे कार्यक्रमात बदल
उपमुख्यमंत्री Ajit Pawar यांच्या निधनानंतर राज्य शासनाने 28 ते 30 जानेवारी 2026 या कालावधीत तीन दिवसांचा दुखवटा जाहीर केला. या कालावधीत सार्वजनिक कार्यक्रम टाळण्याचे निर्देश असल्याने निवडणूक प्रक्रियेतील उर्वरित टप्प्यांच्या तारखांमध्ये बदल करणे आवश्यक ठरले.
सर्वोच्च न्यायालयाच्या मुदतीचा विचार
जिल्हा परिषद व पंचायत समिती निवडणुकांबाबत माननीय सर्वोच्च न्यायालयाने 31 जानेवारी 2026 नंतर केवळ दोन आठवड्यांची मुदतवाढ दिल्याने, निवडणूक प्रक्रिया ठरलेल्या कालमर्यादेत पूर्ण करणे बंधनकारक होते. या सर्व बाबींचा विचार करून राज्य निवडणूक आयोगाने मतदान व मतमोजणी पुढे ढकलण्याचा निर्णय घेतला.
सुधारित कार्यक्रम कधी?
आयोगाच्या निर्देशानुसार संबंधित जिल्हाधिकारी 31 जानेवारी 2026 रोजी सुधारित निवडणूक कार्यक्रमाची अधिकृत अधिसूचना प्रसिद्ध करतील. त्यानुसार 7 फेब्रुवारी 2026 रोजी सकाळी 7.30 ते सायंकाळी 5.30 या वेळेत मतदान होईल.
प्रचाराची मुदत व मतमोजणी
नव्या कार्यक्रमानुसार जाहीर प्रचाराची समाप्ती 5 फेब्रुवारी रोजी रात्री 10 वाजता होईल. 9 फेब्रुवारी 2026 रोजी सकाळी 10 वाजता मतमोजणी सुरू होणार असून, निकाल जाहीर झाल्यानंतर संबंधित ठिकाणची आचारसंहिता तात्काळ संपुष्टात येईल.
राजपत्रात नावे प्रसिद्ध
मतमोजणी पूर्ण झाल्यानंतर निवडून आलेल्या जिल्हा परिषद व पंचायत समिती सदस्यांची नावे 11 फेब्रुवारी 2026 पर्यंत शासन राजपत्रात प्रसिद्ध केली जाणार आहेत. यामुळे या निवडणुकांची संपूर्ण प्रक्रिया फेब्रुवारीच्या दुसऱ्या आठवड्यात पूर्ण होणार आहे.
