पुणे, ८ ऑक्टोबर २०२६ : प्रो कॅटेगरीमध्ये पहिल्या आणि दुसऱ्या स्थानावर राहिलेले योहान इमॅन्युएल आणि मोहम्मद मिकाइल, अमेचर कॅटेगरीमधील टॉप दोन रायडर्स कार्तिक आर आणि जोबिन खारमलकी तसेच विमेन्स कॅटेगरीमध्ये पहिल्या आणि दुसऱ्या स्थानावर राहिलेल्या लानी झेना फर्नांडिस आणि सायमाह एजाज बेग यांनी ऑस्ट्रियाचा दौरा केला. कोईम्बतूरमधील कारी मोटर स्पीडवे येथे केटीएम कप सीझन ३ ची सांगता झाल्यानंतर या सहा रायडर्सना ऑस्ट्रियाला जाण्याची संधी मिळाली.
ऑस्ट्रियामध्ये त्यांना रेसिंगची एक वेगळी बाजू अनुभवता आली. केटीएम रेसिंग फॅक्टरी आणि केटीएम मोटोहॉल येथे रेसिंगच्या पडद्यामागे चालणारे काम त्यांनी जवळून पाहिले. त्याचबरोबर मोटोजीपी वीकेंडसाठी केली जाणारी तयारी, त्यासाठी आवश्यक असलेला संवाद आणि टीमवर्क यांचाही त्यांना अनुभव घेता आला.
योहान इमॅन्युएलसाठी केटीएम रेसिंग फॅक्टरीची भेट म्हणजे रेसिंग सीझनमध्ये ट्रॅकपासून दूर पडद्यामागे होणाऱ्या विविध कामांची माहिती घेण्याची संधी होती. त्याला केटीएमचा डकारमधील वारसाही जवळून जाणून घेता आला.
“ऑस्ट्रियाचा दौरा हा एक अविस्मरणीय अनुभव होता. केटीएम रेसिंग फॅक्टरी मध्ये रेसिंग सीझनदरम्यान पडद्यामागे किती काम केले जाते, याबद्दल मला खूप काही शिकायला मिळाले. डकारमधील केटीएम चा इतिहास आणि सलग २० वर्षे विजय मिळवण्याची त्यांची कामगिरी पाहून मी खरोखरच प्रभावित झालो.”, असे योहान म्हणाला.
रेड बुल रिंग येथे या सहा रायडर्सनी ऑस्ट्रियन ग्रां प्रिचा वीकेंड केटीएम फॅक्टरी टीमच्या मोटोजीपी पॅडॉकमध्ये घालवला. रेससाठी केली जाणारी तयारी त्यांनी जवळून पाहिली आणि रेसिंगच्या पडद्यामागे काम करणाऱ्या टीममधील लोकांना भेटले. त्यांनी पेड्रो अकोस्टाची भेट घेऊन त्याच्याशी संवादही साधला. हे सहाही रायडर्स ज्या स्तरावर पोहोचण्याचे स्वप्न पाहत आहेत, त्या स्तरावर पेड्रो स्पर्धा करत आहे.
केटीएमच्या होम ग्रां प्रिमध्ये पेड्रो अकोस्टाने रेड बुल केटीएम फॅक्टरी रेसिंगसाठी आपला पहिला मोटोजीपी विजय मिळवला. या सहा रायडर्सनी फॅक्टरी टीमसोबत राहून हा विजय प्रत्यक्ष पाहिला आणि पोडियम वरील सेलिब्रेशनमध्येही ते सहभागी झाले.
या अनुभवाबद्दल योहान म्हणाला, “केटीएम फॅक्टरी रेसिंगच्या मोटोजीपी पॅडॉकमध्ये प्रत्यक्ष उपस्थित राहणे, पेड्रो अकोस्टाचा पहिला विजय पाहणे आणि पोडियमवरील सेलिब्रेशन अनुभवणे हे सगळेच अविश्वसनीय होते. मी जितका जास्त वेळ तिथे होतो, तितकीच स्वतः त्या स्तरावर पोहोचण्याची माझी इच्छा अधिक तीव्र होत गेली.”
सायमाह एजाज म्हणाले की “हा अनुभव माझ्यासाठी खूपच खास होता. पेड्रो अकोस्टाला त्याचा पहिला मोटोजीपी विजय मिळवताना पाहणे, पोडियम सोहळा अगदी जवळून अनुभवणे, रायडर्सना भेटणे आणि केटीएम फॅक्टरी पॅडॉकचा आतून अनुभव घेणे या सगळ्याच गोष्टी माझ्यासाठी खास होत्या. इथला स्तर वेगळा होता, पण त्यामागची भावना मात्र ओळखीची होती.”
जोबिन खारमलकीसाठी केटीएम फॅक्टरी टीमसोबत राहून मोटोजीपी अनुभवण्याची ही अशा प्रकारची पहिलीच संधी होती. तो म्हणाला, “मी पहिल्यांदाच मोटोजीपी रेस प्रत्यक्ष पाहिली. रायडर्सना भेटलो, त्यांच्या पिट बॉक्सला भेट दिली आणि पोडियमच्या ठिकाणी केटीएम फॅक्टरी टीमसोबत विजयाचा आनंदही साजरा केला. हे सगळे माझ्या कल्पनेपलीकडचे होते. आयुष्यात एकदाच मिळणारा हा अनुभव होता.”
या सहा रायडर्सना ऑस्ट्रियाच्या दौऱ्यामुळे केटीएम कप मधील रेसिंगच्या अनुभवापलीकडे जाऊन केटीएम च्या व्यापक रेसिंग विश्वाचा अनुभव घेता आला. मोटोजीपी वीकेंडमागील तयारी, टीमवर्क आणि शिस्त यांचा अनुभव त्यांना प्रत्यक्ष घेता आला. आता केटीएम कप सीझन ४ सुरू झाला असून 30 हून अधिक शहरांमध्ये सिटी रेस आयोजित करण्यात येत आहेत. त्यामुळे रायडर्सच्या पुढील गटाला रेसिंग ग्रिडवर स्वतःचा प्रवास सुरू करण्याची संधी मिळत आहे.
लानी झेना फर्नांडिस म्हणाले की “आपण रेसिंग का करतो, सतत पुढे जाण्यासाठी प्रयत्न का करतो आणि आपल्या स्वप्नाचा पाठलाग करणे का महत्त्वाचे आहे, याची या अनुभवाने मला पुन्हा जाणीव करून दिली. ज्या जगाचा भाग होण्याचे स्वप्न मी नेहमीच पाहिले आहे, त्या जगाचा अनुभव घेण्याची संधी दिल्याबद्दल केटीएम इंडियाचे आभार.
