विद्यार्थीनीच्या व्हिडीओ स्टेटमेंटवरून वाद; अखिल भारतीय विद्यार्थी परिषदेच्या विद्यार्थ्याला शिवीगाळ करून मारहाण केल्याची तक्रार
पुणे : शिवाजीनगर येथील सीओईपी हॉस्टेलमध्ये विद्यार्थीनीचे व्हिडीओ स्टेटमेंट घेतल्याच्या प्रकरणावरून निर्माण झालेल्या वादातून एका १९ वर्षीय विद्यार्थ्याला शिवीगाळ करून मारहाण केल्याची घटना समोर आली आहे. या प्रकरणी शिवाजीनगर पोलिसांनी पुष्कर आबनावे, भूषण राणभरे, अक्षय जैन, सौरभ आमराळे, सागर धाडवे आणि प्रथमेश आबनावे यांच्यासह त्यांच्यासोबत उपस्थित असलेल्या एनएसयूआय व युवक काँग्रेसच्या सुमारे ५० ते ६० कार्यकर्त्यांविरुद्ध गुन्हा दाखल केला आहे.
याप्रकरणी मल्हार निलेश पाटील (वय १९, रा. औंध, पुणे) यांनी शिवाजीनगर पोलीस ठाण्यात फिर्याद दिली आहे. त्यानुसार भारतीय न्याय संहितेतील कलम ११५(२), १८९(१), १८९(२), १९१(२), ३५१(१), ३५२ तसेच महाराष्ट्र पोलीस कायदा कलम ३७(३), १३५ अन्वये गुन्हा दाखल करण्यात आला आहे.
विद्यार्थीनीच्या व्हिडीओ स्टेटमेंटवरून वाद
पोलिसांनी दिलेल्या माहितीनुसार, २१ ऑगस्ट रोजी सीओईपी हॉस्टेल, शिवाजीनगर येथे एका विद्यार्थीनीवर दबाव टाकून तिच्याकडून व्हिडीओ स्टेटमेंट घेण्यात आल्याचा आरोप आहे. या प्रकाराबाबत विचारपूस आणि चर्चा करण्यासाठी फिर्यादी मल्हार पाटील हे अखिल भारतीय विद्यार्थी परिषदेच्या सहकाऱ्यांसह सीओईपी हॉस्टेलमध्ये गेले होते.
यावेळी तेथे पुष्कर आबनावे, भूषण राणभरे, अक्षय जैन, सौरभ आमराळे, सागर धाडवे, प्रथमेश आबनावे आणि त्यांच्यासोबत एनएसयूआय व युवक काँग्रेसचे कार्यकर्ते उपस्थित असल्याचे फिर्यादीत नमूद करण्यात आले आहे.
शिवीगाळ करून मारहाण केल्याचा आरोप
फिर्यादीच्या म्हणण्यानुसार, यावेळी संबंधितांनी त्यांना शिवीगाळ करून मारहाण केली. या घटनेनंतर त्यांनी शिवाजीनगर पोलीस ठाण्यात धाव घेत कायदेशीर तक्रार दाखल केली.
या प्रकरणी २२ ऑगस्ट २०२६ रोजी पहाटे ५ वाजून १३ मिनिटांनी गुन्हा दाखल करण्यात आला असून, पोलीस ठाण्याच्या स्टेशन डायरीमध्ये नोंद क्रमांक ०९/२०२६ करण्यात आली आहे.
पोलिसांकडून तपास सुरू
घटना २१ ऑगस्ट रोजी रात्री साडेआठ ते रात्री ११ वाजण्याच्या दरम्यान सीओईपी हॉस्टेल, शिवाजीनगर येथे घडल्याचे पोलिसांच्या नोंदीत नमूद आहे. घटनास्थळ शिवाजीनगर पोलीस ठाण्यापासून सुमारे एक किलोमीटर पूर्वेस आहे.
या घटनेची माहिती मिळाल्यानंतर पुणे शहर पोलीस सहआयुक्त, पश्चिम प्रादेशिक विभागाचे अपर पोलीस आयुक्त, परिमंडळ एकचे पोलीस उपायुक्त, विश्रामबाग विभागाचे सहायक पोलीस आयुक्त तसेच शिवाजीनगर पोलीस ठाण्याचे प्रभारी वरिष्ठ पोलीस निरीक्षक यांनी घटनास्थळी भेट दिल्याची नोंद आहे.
गुन्ह्याचा तपास अमर काळंगे, पोलीस निरीक्षक (गुन्हे), शिवाजीनगर पोलीस ठाणे करीत आहेत. गुन्हा दाखल करण्याची कारवाई पोलीस उपनिरीक्षक विकास काठे यांनी केली.
दरम्यान, या प्रकरणात नेमका वाद कशामुळे झाला, विद्यार्थीनीचे व्हिडीओ स्टेटमेंट कोणत्या परिस्थितीत घेण्यात आले आणि त्यानंतर झालेल्या कथित मारहाणीमध्ये नेमकी कोणाची भूमिका होती, याबाबत पोलिसांकडून पुढील तपास सुरू आहे.
