प्रतिनिधी – मानस, मुंबई : अभिनेता राम चरण आणि अभिनेत्री जान्हवी कपूर यांची प्रमुख भूमिका असलेल्या ‘पेद्दी’ या स्पोर्ट्स ड्रामा चित्रपटाने बॉक्स ऑफिसवर दमदार कामगिरी करत अवघ्या तीन दिवसांत 125 कोटी रुपयांहून अधिक कमाई केली आहे. प्रेक्षकांकडून मिळणाऱ्या उत्स्फूर्त प्रतिसादामुळे हा चित्रपट लवकरच 150 कोटींचा टप्पा पार करेल, असा अंदाज व्यक्त केला जात आहे.
दिग्दर्शक बुची बाबू सना यांच्या दिग्दर्शनाखाली साकारलेल्या या चित्रपटाने प्रदर्शनाच्या पहिल्याच दिवसापासून कमाईचे नवे विक्रम प्रस्थापित करण्यास सुरुवात केली. सॅकनिल्कच्या अहवालानुसार, चित्रपटाने पेड प्रिव्ह्यूमधून 18.50 कोटी रुपयांची कमाई केली. त्यानंतर पहिल्या दिवशी 51 कोटी रुपये, तर दुसऱ्या दिवशी 26.90 कोटी रुपयांचा गल्ला जमवला.
तिसऱ्या दिवशीही जोरदार कमाई
प्रदर्शनाच्या तिसऱ्या दिवशी म्हणजे शनिवारी ‘पेद्दी’ने रात्रीपर्यंत सुमारे 29 कोटी रुपयांची कमाई केली. यामुळे चित्रपटाची भारतातील एकूण कमाई 125.40 कोटी रुपयांवर पोहोचली आहे.
तेलुगू प्रेक्षकांची विशेष पसंती
चित्रपटाला तेलुगू प्रेक्षकांकडून मोठा प्रतिसाद मिळत असून सर्वाधिक कमाई तेलुगू भाषेतून झाली आहे. अहवालानुसार, चित्रपटाने तेलुगू आवृत्तीत 115.65 कोटी रुपयांचा व्यवसाय केला आहे.
इतर भाषांमधील कमाई पुढीलप्रमाणे आहे :
- हिंदी : 8.05 कोटी रुपये
- कन्नड : 59 लाख रुपये
- तमिळ : 95 लाख रुपये
- मल्याळम : 16 लाख रुपये
राम चरण-जान्हवीची जोडी ठरली हिट
‘पेद्दी’मध्ये राम चरणने साकारलेली भूमिका प्रेक्षकांच्या पसंतीस उतरली असून जान्हवी कपूरच्या अभिनयाचेही विशेष कौतुक होत आहे. स्पोर्ट्स ड्रामा, भावनिक कथानक आणि दमदार अभिनय यांच्या जोरावर चित्रपटाने प्रेक्षकांची मने जिंकली आहेत.
चित्रपटाच्या वाढत्या कमाईचा वेग पाहता, येत्या काही दिवसांत ‘पेद्दी’ 150 कोटींचा टप्पा सहज पार करेल, असा विश्वास चित्रपटसृष्टीतील जाणकार व्यक्त करत आहेत.
