राज्याच्या राजकारणात अनेक दिवसांपासून गाजणाऱ्या महाराष्ट्र नवनिर्माण सेना (मनसे) आणि शिवसेना (ठाकरे गट) यांच्यातील युतीची चर्चा अखेर प्रत्यक्षात उतरली आहे. दोन्ही पक्षांचे प्रमुख नेते – राज ठाकरे आणि उद्धव ठाकरे – यांनी यापूर्वी दिलेल्या सूचक वक्तव्यांनंतर आता ही युती औपचारिक झाली असून, त्यामध्ये जागावाटपाचा फॉर्म्युलाही निश्चित झाला आहे.
🔸 ठाकरे बंधू पुन्हा एकत्र?
मुंबई महापालिका आणि स्थानिक स्वराज्य संस्थांच्या आगामी निवडणुकीसाठी राज आणि उद्धव ठाकरे हे एकत्र येणार असल्याची शक्यता याआधीच वर्तवली जात होती. आता ती शक्यता प्रत्यक्षात आली असून, यामुळे राज्यातील राजकीय समीकरणांमध्ये मोठा बदल होण्याची चिन्हं आहेत.
या युतीची चाहूल लागताच महायुतीतील भाजप, शिंदे गट आणि राष्ट्रवादी (अजित पवार गट) यांनी आपापल्या रणनीती आखायला सुरुवात केली आहे. दोन्ही पक्षांनी आपल्या कार्यकर्त्यांना निवडणुकीच्या तयारीसाठी सज्ज राहण्याचे आदेशही दिले आहेत. उद्धव ठाकरे यांनी स्पष्ट शब्दांत सांगितलं होतं – “युतीचा निर्णय आमच्यावर सोडा, तुम्ही कामाला लागा“, आणि राज ठाकरेंनीही अशाच स्वरूपाचं विधान केलं होतं.
🔸 बेस्ट कामगार निवडणुकीत युतीची चाचणी
मुंबईतील बेस्ट कामगार मतदारसंघाच्या निवडणुकीत मनसे आणि ठाकरे गट एकत्र रिंगणात उतरणार आहेत. ‘उत्कर्ष पॅनल’ या नावाने ही युती उभी राहत असून, त्यासाठी जागावाटपाचे समीकरणही ठरले आहे.
मिळालेल्या माहितीनुसार, एकूण 21 जागांपैकी 19 जागांवर ठाकरे गटाची ‘कामगार सेना’ निवडणूक लढवणार असून, उर्वरित 2 जागा मनसेच्या बेस्ट कामगार संघटनेला दिल्या जाणार आहेत. 7 ऑगस्ट रोजी युतीच्या फॉर्म्युल्यावर शिक्कामोर्तब होण्याची शक्यता आहे.
ही युती केवळ बेस्ट निवडणुकीपुरती मर्यादित राहणार की ती पुढे मुंबई महापालिका आणि राज्यातील इतर निवडणुकांमध्येही विस्तारेल, याकडे सगळ्यांचं लक्ष लागलेलं आहे. ठाकरे बंधूंनी जर पुन्हा एकत्र येत राजकारणात मोर्चेबांधणी केली, तर विरोधकांसाठी ही मोठी डोकेदुखी ठरू शकते.
