पुणे : पुण्यातील खराडी परिसरात रेव्ह पार्टीवर पोलिसांनी केलेल्या कारवाईमुळे खडसे कुटुंब अडचणीत आले आहे. ज्येष्ठ नेते एकनाथ खडसे यांचे जावई आणि व्यावसायिक प्रांजल खेवलकर यांना पोलिसांनी या पार्टीतून अटक केली आहे. त्यानंतर आता त्यांच्या पत्नी रोहिणी खडसे यांनी पुणे पोलिस आयुक्तालयात वरिष्ठ अधिकाऱ्यांची भेट घेतली आहे.
पतीच्या अटकेनंतर रोहिणी खडसेची पोलिस भेट
प्रांजल खेवलकर यांना अटक झाल्यानंतर रोहिणी खडसे बुधवारी रात्री 8 वाजता पुणे पोलिस आयुक्तालयात पोहोचल्या. यावेळी त्यांनी वरिष्ठ पोलिस अधिकाऱ्यांची भेट घेऊन पतीवर नोंदवण्यात आलेल्या गुन्ह्यांची माहिती घेतली असल्याचे समजते.
रविवारी मध्यरात्री, पुणे पोलिसांनी खराडीतील एका आलिशान फ्लॅटवर चालू असलेल्या हाय-प्रोफाइल रेव्ह पार्टीवर छापा टाकला. ही पार्टी ‘हाऊस पार्टी’च्या नावाखाली सुरू होती. कारवाईदरम्यान प्रांजल खेवलकर यांच्यासह सात जणांना ताब्यात घेण्यात आले.
या ठिकाणी दारू, हुक्का आणि अंमली पदार्थ मोठ्या प्रमाणात आढळून आले. पोलिसांच्या गुप्त माहितीच्या आधारे ही कारवाई करण्यात आली. प्रांजल खेवलकर हे एकनाथ खडसेंचे जावई असल्याने या घटनेने राजकीय वर्तुळात खळबळ उडाली आहे.
प्रांजल खेवलकर यांचे नाव यापूर्वीही वादग्रस्त प्रकरणांमध्ये आल्याचे समोर आले आहे. सामाजिक कार्यकर्त्या अंजली दमानिया यांनी यांच्यावर गंभीर आरोप केले होते. त्यामुळे रेव्ह पार्टीतील अटक ही त्यांच्यासाठी दुसरी मोठी अडचण ठरली आहे.
प्रांजल खेवलकर हे एक व्यावसायिक असून, रिअल इस्टेट आणि इव्हेंट मॅनेजमेंट क्षेत्रात त्यांचा व्यवसाय आहे. त्यांची स्वतःची काही कंपन्याही आहेत. जरी ते मुक्ताईनगरमध्ये खडसे कुटुंबासोबत राहत असले, तरी त्यांचे पुण्यात वारंवार येणे-जाणे सुरू असते.
या घटनेने केवळ खडसे कुटुंबासाठी नव्हे तर संपूर्ण राज्यातील राजकीय वातावरणात एकच खळबळ उडवली आहे. पुढील तपासात आणखी कोणती माहिती समोर येते, हे पाहणं महत्त्वाचं ठरणार आहे.
