रामल्ला : भारतात ‘पारले-जी’ बिस्कीट अगदी स्वस्त आणि असंख्यांना चहाबरोबर खायला आवडणारे बिस्कीट आहे. पण गाझा पट्टीमध्ये या बिस्कीटाची ओळख वेगळीच आहे. युद्धामुळे बेजार झालेल्या गाझा पट्टीमध्ये हेच बिस्कीट आता चैनीची वस्तू बनलं आहे.
भारतात ५ रुपयांना मिळणारं ‘पारले-जी’ बिस्कीट गाझा पट्टीमध्ये २३०० रुपयांना मिळत आहे. गाझा पट्टीतील लोकांची परिस्थिती खूप वाईट आहे. त्यांच्यासाठी हे बिस्कीट म्हणजे एकप्रकारे निराशा दाखवणारे प्रतीक आहे.
गाझा मध्ये राहणाऱ्या मोहम्मद जवाद नावाच्या एका माणसाने सोशल मीडियावर एक पोस्ट टाकली. त्यातून ‘पारले-जी’च्या किंमती समोर आल्या. या पोस्टमुळे जगाला कळले की युद्धामुळे गाझा पट्टीची परिस्थिती किती नाजूक आहे. संयुक्त राष्ट्राने गाझाला जगातील सर्वात धोकादायक युद्ध क्षेत्र घोषित केले आहे. जिथे लोकांना खायला अन्न नाही.
मोहम्मद जवादने एक व्हिडिओ पोस्ट केला आहे. त्यात त्याची मुलगी रफ़ीफ ‘पारले-जी’ बिस्कीटचा पुडा घेऊन उभी आहे. जवादने सांगितले की, या पुड्यासाठी त्यांनी २४ युरो (जवळपास २,३४२ रुपये) दिले. हेच बिस्कीट भारतात ५ रुपयांपेक्षा कमी किमतीत मिळतं.
आंतरराष्ट्रीय दुकानांमध्ये त्याची किंमत जवळपास १०० रुपये असते. त्यांनी X वर लिहिले, “किंमत १.५ युरोवरून २४ युरोपेक्षा जास्त झाली असली, तरी मी रफ़ीफला तिची आवडती वस्तू देण्यास नकार देऊ शकलो नाही.”
लोकांना हे ऐकून खूप आश्चर्य वाटले. खासकरून भारतीयांना, कारण ‘पारले-जी’ हे त्यांच्या लहानपणापासून स्वस्त दरात मिळणारं बिस्कीट आहे. जवादची पोस्ट सोशल मीडियावर खूप व्हायरल झाली. अनेक भारतीय लोकांनी सरकारला आणि ‘पारले’ कंपनीला मदत करण्यासाठी टॅग केले.
एका यूजरने लिहिले: “भारताने मदत म्हणून पॅलेस्टिनी लोकांना ‘पारले-जी’ पाठवले. पण ते मदत ट्रक हमासने ताब्यात घेतले. त्यांनी ते बिस्कीट आणि औषधे गरजूंना जास्त किंमतीत विकली. ५ रुपयांचे ‘पारले-जी’ २५०० रुपयांना विकले जात आहे. हे त्या लोकांचे खरे रूप आहे, जे निरागस लोकांच्या दुःखाचा फायदा घेतात.”
जवादने या पोस्टला उत्तर देताना सांगितले की, “काही लोकांना वाटते की गाझाच्या लोकांना जी मदत येते, ती व्यवस्थित वाटली जाते. पण सत्य हे आहे की, मदतीचे सामान चोरून जास्त किमतीत विकण्यासाठी एजंट आणि चोरांना नेमले आहे. उदाहरणार्थ, गव्हाचे पीठ जवळपास ५०० डॉलरला विकले जाते. साखर ९० डॉलर प्रति किलो दराने विकली जाते. सगळ्या जीवनावश्यक वस्तू खूप जास्त किंमतीत विकल्या जातात. जे लोक जास्त पैसे देऊ शकत नाहीत, ते जीव धोक्यात घालून गरजेच्या वस्तू घेतात. काही लोक खूप मोठ्या प्रमाणात चोरी करतात आणि ते सामान बाजारात जास्त किंमतीत विकतात.”
