हिंदु जनजागृती समितीच्या वतीने पोलीस, प्रशासन, महाविद्यालये येथे ‘व्हॅलेंटाईन डे’ निमित्त होणारे अपप्रकार रोखण्यासाठी 50 हून अधिक निवेदने सादर !
पुणे – पाश्चात्यांचे अंधानुकरण टाळून ‘व्हॅलेंटाईन डे’ सारख्या कुप्रथा यांचा विरोध, तसेच या दिवशी होणारे अपप्रकार रोखण्यासाठी हिंदु जनजागृती समितीच्या वतीने पुणे अन् पिंपरी चिंचवड येथे संस्कृती रक्षण चळवळ राबवण्यात येत आहे. यावेळी पुणे जिल्हाधिकारी कार्यालयातील विशेष कार्यकारी दंडाधिकारी श्री.धनंजय जाधव यांना निवेदन देण्यात आले. सिंहगड रस्ता येथील नगरसेविका ज्योती गोसावी यांना निवेदन देण्यात आले. त्यांच्या वतीने त्यांच्या सहकाऱ्यांनी निवेदन स्वीकारले. मा.पोलीस उपायुक्त, विशेष शाखा, पुणे यांच्या कार्यालयात निवेदन देण्यात आले. मा.शिक्षणाधिकारी, शिक्षण विभाग (प्राथमिक) तसेच (माध्यमिक)पुणे म.न.पा. यांच्या कार्यालयात निवेदने देण्यात आली. हिंदु जनजागृती समितीच्या वतीने पोलीस, प्रशासन आणि महाविद्यालये येथे एकूण 50 हून अधिक ठिकाणी निवेदने देण्यात आली. ही मोहीम 14 फेब्रुवारी पर्यंत राबवण्यात येणार आहे.
निवेदनाच्या माध्यमातून करण्यात आलेल्या मागण्या
1) 14 फेब्रुवारी या दिवशी पोलिसांची गस्ती पथके नियुक्त करून शाळा-महाविद्यालय परिसरात अपप्रकार करणारे समाजकंटक, अति वेगात वाहन चालवणारे युवक यांवर कारवाई करावी.
2) शाळा-महाविद्यालयांमध्ये असे प्रकार घडू नयेत यासाठी संबंधितांना सूचना द्याव्यात अशा प्रकारच्या मागण्या पोलिसांकडे निवेदनाच्या माध्यमातून करण्यात आल्या.
3) शाळा महाविद्यालयांनी विद्यार्थ्यांना कुप्रथांचे दुष्परिणाम सांगून भारतीय संस्कृतीचे महत्त्व सांगणारे व्याख्यान आयोजित करावे, अशी मागणी निवेदनाच्या माध्यमातून शाळा महाविद्यालयांच्या मुख्याध्यापकांकडे करण्यात आली आहे.
या मागणीला विविध शाळा महाविद्यालयांतून चांगला प्रतिसाद मिळत आहे. त्या अंतर्गत पुणे जिल्ह्यातील विविध शाळा महाविद्यालयांतून ‘व्हॅलेंटाईन डे’ च्या दिवशी होणारे अपप्रकार रोखण्यासाठी प्रबोधन करण्यात आले. व्याख्यान झाल्यानंतर अनेक विद्यार्थ्यांनी स्वतःहुन येऊन त्यांच्या मनातील शंकांचे जिज्ञासेने निरसन करून घेतले. तसेच व्हॅलेंटाईन डेसारख्या पाश्‍चात्त्य विकृतीला बळी न पडता भारतीय संस्कृतीनुसार आचरण करण्याचे ध्येय घेतले आहे.
