पुणे येथे सामूहिक गुढी उभारून धर्माभिमान्यांनी घेतली हिंदु राष्ट्र स्थापनेची प्रतिज्ञा !
पुणे – गुढीपाडवा अर्थात् चैत्र शुद्ध प्रतिपदा. ब्रह्मदेवाने सृष्टीची निर्मिती करून सत्ययुगाचा प्रारंभ केला म्हणून हा दिवस नववर्षाचा प्रारंभदिन म्हणून साजरा केला जातो. नववर्षाचा हा प्रारंभदिन पुणे जिल्ह्यात ठिकठिकाणी उत्साहात साजरा करण्यात आला. पुणे जिल्ह्यातील आळंदेवाडी, पारगाव, हडपसर,निरा, केडगाव, मंचर, हिवरेगाव, नारायणपूर, दिवेगाव, डाळिंबगाव, श्री क्षेत्र वडगाव काशिंबेक आदी ठिकाणी धर्मशिक्षणवर्गातील धर्मप्रेमींनी सामूहिक गुढी उभारून गुढीचे पूजन केले. तसेच हिंदू राष्ट्र स्थापनेची प्रतिज्ञा घेतली. हिंदु जनजागृती समितीकडून पुणे जिल्ह्यातील 25 हून अधिक शाळा, सोसायटी तसेच मंदिरांमध्ये गुढीपाडवा विषयी प्रवचन घेण्यात आले, तसेच ‘गुढी कशी उभारावी?’ याचे प्रात्यक्षिकाद्वारे प्रबोधन करण्यात आले. ठिकठिकाणी फलक प्रसिद्धीच्या माध्यमातून गुढीपाडव्याविषयी माहिती देण्यात आली.
आळंदेवाडी तालुका भोर, पुणे येथे धर्मशिक्षणवर्गातील धर्मप्रेमींनी ग्रामदैवत श्री भैरवनाथ मंदिरासमोर सामूहिक गुढी उभारून प्रार्थना केली. सामूहिक गुढी उभारण्याची सर्व सिद्धता, प्रसार,सेवा धर्मशिक्षणवर्गातील धर्मप्रेमींनी केली.
गराडे गाव, येथे ग्रामसभेत ‘गुढीपाडवा आणि संभाजी महाराजांचे बलिदान’ या विषयावर हिंदु जनजागृती समितीच्या वतीने व्याख्यान आयोजित केले होते. यावेळी उपस्थित ग्रामस्थांनी मोठ्या उत्साहाने हिंदु राष्ट्राची गुढी उभारण्याचे नियोजन केले. अशा प्रकारे पुणे जिल्ह्यात ठिकठिकाणी मोठ्या उत्साहात नववर्षाचे स्वागत करण्यात आले.
सहस्रो धर्मप्रेमींनी या उपक्रमाचा लाभ घेतला. तसेच शास्त्रानुसार गुढी उभी करून नववर्ष साजरे केले. धर्मप्रेमींनी हिंदु राष्ट्राची शपथ घेऊन मोठ्या उत्साहाने घोषणा दिल्या.
