मुंबई : (विलास गुरव) महाराष्ट्राची हास्यजत्रा’ फेम अभिनेता प्रभाकर मोरे यांनी राष्ट्रवादी काँग्रेस पक्षात प्रवेश केला आहे. विरोधी पक्षनेते अजित पवार यांच्या उपस्थित मोरे यांनी राष्ट्रवादीमध्ये प्रवेश केला आहे.
मुंबईतील राष्ट्रवादीच्या कार्यालयात हा प्रवेशाचा कार्यक्रम संपन्न झाला. यावेळी प्रभाकर मोरे यांना कोकण विभाग अध्यक्षपदाची जबाबदारी पक्षातर्फे देण्यात आली आहे. तसंच चित्रपट सांस्कृतिक विभागाची जबाबदारी दिली आहे, अशी घोषणा खुद्द अजित पवारांनी केली.
यावेळी बोलताना प्रभाकर मोरेंनी म्हटलं कि, कलाकारांच्या व्यथा मांडण्यासाठी आणि कोकणातील कला संस्कृतीत काही अडचणी आहेत. त्यामध्ये मदत करण्यासाठी. व्यवस्थित मार्गदर्शन करण्यासाठी म्हणुन हा प्रवेश केला.
अजित पवार, सुप्रिया सुळे यांचा कलाकारांवर हात आहे. मला सर्वसामान्य कलाकारांसाठी काही तरी करण्याची इच्छा आहे. मला चांगले काम करायचे आहे अजित पवार यांच्या स्वभावामुळे मी राष्ट्रवादीमध्ये प्रवेश करत आहे.
प्रभाकर मोरे ‘महाराष्ट्राची हास्यजत्रा’मधून प्रेक्षकांना खळखळून हसवत असले तरी याआधी त्यांनी अनेक चित्रपटांमध्ये सहाय्यक विनोदी अभिनेत्याची भूमिका साकारली आहे. त्यांचे हावभाव, सहजसाधा विनोद प्रेक्षकांना पोटधरुन हसायला भाग पाडतो.
अभिनय क्षेत्रात यशस्वी कामगिरी करणाऱ्या प्रभाकर यांचा राजकारणातील प्रवेश कितपत यशस्वी ठरणार याकडे सर्वांचं लक्ष लागून आहे.
